Skip to content
Home » Chanchinthar » Kangmei laka mipui him nan thupek tichhuak

Kangmei laka mipui him nan thupek tichhuak


Serchhip District Magistrate Nazuk Kumar, IAS chuan nimin khan kangmei laka mipui himna tur atan thupek a tichhuak.

Nimina thupek a tihchhuahah chuan District Magistrate chuan khua a lo ṭhalin lo hal a lo hun leh dawn ta a, lo hal leh huan vah bak ram tihkan ṭhin a nih avangin kan ram thing leh mau, ramsa, nungcha, kan lui tui leh tuihnaten an tuar nasa em em tih a tarlang a, kang mei chhuak avangin in leh lo, rohlu leh nunna hlu takten a tuar fo tih a tarlang a, chuvangin kangmei laka kan him tlan nan khapna thupek chhuah chu thil ṭul tak a ni tih sawiin, The Mizoram (Prevention and Control of Fire in the Village Ram) Rule, 2001 leh District, Level Committee on Fire Prevention (DLCFP) meeting ni 7.1.2022-a ṭhukhawm thu chhuak bawhzuiin, Section 144 Cr.Pc-in thuneihna a pek hmangin khapna thupek a tichhuak tih a tarlang.

Thupekah chuan mi tumahin meilam ṭha tawk sial hmasa lo chuan lo/ huan leh leipui an hâl tur a ni lo tih a tarlang a, ramhnuaia meichhem timit lova kalsan phal a nih loh thu leh, Serchhip District chhunga lo huan, leipui, Chachheh hâl turte chuan March ni 15, 2022 aia tai lovah hâl vek tur a ni, a ti.

Hei bakah hian mi tumahin mihring nunna leh bungrua/ ro atana hlauhawm turin kangmei an tichhuak tur a ni lo tiin, eirawngbawlna leh, ran chaw chhumna leh, intihlumna atana hman thuk, meihawl, khawnvartui, gas, electric thuk etc. kangmei tichhuak thei zawnga chelek a khap bawk a, he thupek hi sût leh a nih hma chuan thla hnih chhung atan hman tur a ni a, thupek bawhchhiate chu Section 188 IPC angin hrem theih a ni tih a tarlang bawk.

Leave a Reply

This site uses Akismet to reduce spam. Learn how your comment data is processed.