Chief Minister Zoramthanga chuan nimin khan Tlabung RD Block thar puangin, sawrkar laipuiin state-te hnena a bika ṭanpuina a pek aṭangin Tlabung bial tan cheng nuai 200 pek a nih thu sawiiin, a dang pawh pek belh tum a nih thu a sawi bawk.
Tlabung RD Block puanna inkhawm hi Licheng mualah buatsaih niin, Chief Minister chuan Tlabung RD Block chu a takin, a nih tur ang taka a kal theih nan bawhzui ngai turte bawhzui thuai a, RD department leh a kaihhnawih department dangte nen sawiho a, chak taka hmalak zui zel a nih tur thu a sawi a. Kumin chhung ngeia RD office function-tir tum a nih thu a sawi a. Tlabung chu lawng chawlh-na hmun pawimawh, ramri dep khaw pawimawh tak a nih avangin leh la ṭhang chauh tur a nih avangin department office hrang hrang pawh a la awm belh zel tur thu a sawi a, tuna RD Block a puan a ni chu malsawmna nasa zawk an hmuh zel theihna tura bul ṭanna nise tiin duhsakna a hlan a ni.
RD Minister Lalruat-kima pawhin thusawiin, Tlabung chu state tan hmun pawimawh tak a nih thu te, chen zelna atan humhalh a, mipui hmasawnna tur atan RD block a dah sawrkarin pawimawh a tih thu leh, chumi atana hmalak a nih chhoh dan a sawi a. Bawhzui ngai dangte theihtawpa bawhzui zel a nih tur thu a sawi bawk.
He inkhawm hi Lawmawma Tochhawng, HPC Vice Chairman chuan a kaihruai a, bialtu MLA Nihar Kanti Chakma leh Lunglei DC Kulothungan A-te pawhin he hunah hian thu an sawi bawk a, Rural Development Department hotute leh Lunglei district hotu engemawzat he hunah hian an tel a ni.
Chief Minister hian nimin zing khan Kawrpui-chhuah tlawhin mipui nen inkawmna hun tawi an hmang bawk a, Kawrpui-chhuah chu Mizoram tan hmun pawimawh tak a nih thu te, bungraw thlenna hmunpui, sumdawnna hmun pawimawh a nih zel theih nan khawthlang lam ami te nen inkalpawhna tur lei dawh te leh hmasawnna ruhrel pawimawh din tura ruahmanna siam a nih thu a sawi a. Hripui leng avanga hun engemawchen chhung chu duh anga hmasawnna hna thawh theih loh phah mahse tunah hri pawhin ziaawm lam a pan avangin chak zawka hna thawh theih ngei a beisei thu a sawi.
Chief Minister hian PWD EE hmunhma pawh nimin khan a tlawh nghal bawk a ni.