Health Minister Dr R. Lalthangliana chuan nimin khan New Delhi-ah sawrkar laipuia hotu hrang hrang a dawr.
Dr. R.Lalthangliana chuan Ayush, Shipping & Waterways Minister Sarbananda Sonowal chu a pisa-ah hmuin Darzokai-Kawlchaw (Chhimtuipui) leh Khawthlangtuipui, Bang-ladesh ramri dep a awm chu mihring leh bungraw phur theihna lawng chi khat – River Cruise Vessel project a siam turin a thlen a, Sonowal chuan a changtu Chairman hnenah uluk deuh zawka lo enfiahtira hmalak dan kawng ngaihtuah tura hrilh a lo tiam a ni.
Dr. R. Lalthangliana hian Ministry of Education (Higher Education) hotute pawh inkawmhona neihpuiin, Mizoram University Southern Campus din tura January 27, 2020-a phalna awm tawh si beisei aia an muang deuh ni a a hriat thu a sawi a, Official-te chuan Mizoram University-te nen ṭang tlanga hma an lakho mek chu chak zawka an kalpui mek thu an lo hrilh a, theihtawp an chhuah zel tih an sawi a, RUSA hnuaia teaching faculties (Asst. Proffesors) mi 70 te hlawh, nikum 2021 April aṭanga vawiin ni thlenga la sanction loh chungchang a thlen pawh chinfel ran theih thuai an inbeisei tih Minister hi an hrilh a ni.
RUSA -3 rang taka kalpui ṭul a tih thu Minister-in a thlen pawh thla khat chhung vela hei hi peihfel an inrin thu an sawi a, Minister hian he RUSA-3 hi New Education Policy nena inmil turin guidelines leh a kalpui dan tur hi her rem theih hram ni sela tih a thlen chu lo ennawn leh a, Minister thu rawn anga kalpui dan tur an lo zawng dawn tih an lo hrilh a ni.
National Institute Technology (NIT), Lengpui a kum engemawzat kaltaa bul ṭan, harsatna hrang hrang avanga hmalakna khaihlak rei lutuk chungchang chu a thlen bawk a. Hei pawh hi awmze neia a kal theih thuai an beisei thu Minister hi an lo hrilh a ni.
Dr. R. Lalthangliana hian Health & Family Welfare Ministry tlawhin Economic Adviser (NHM) Indrani Kaushal leh official pawimawh dangte nen inkawmhona hun an nei bawk a, Health Miniser hian Mizoramin a mamawhna a sân em avangin NHM second instalment cheng vaibelchhe 40 tal a rang thei ang bera release turin a ngen nawn leh a, hei bakah hian PM-ABHIM account chu a rang thei ang bera release vat turin a ngen bawk a, a thu thlente hi a rang thei ang bera chinfel a nih tur thu an lo tiam a, UNICEF-in ICMR kaltlanga RTPCR khawl 8 an rawn pek tur pawh tun thla thar April ni 1, 2022 hian Zoram Medical College, Aizawl, thleng hman vek turin rawn thawn an tum a, an inrua-hman mek tih an sawi a ni.
Dr.Thangtea hian Dr. Vinod K. Paul, Adviser (NE), Niti Aayog chu a pisa ah kawmin, Mizoram district hospital zawng zawng leh PHC (61 nos.) te tana Portable X-ray machine leh ECG Machines bakah testing laboratory khawl bun chungchangte a sawipui a, mumal deuh a ziaka thehlut turin Minister hi thurawn an lo pe a ni.