Govt. Serchhip College NSS Unit huaihawtin nimin chawhnu khan an College Smart Classroom-ah ei tur ṭha ei pawimawhna leh ṭhatna inzirna hun, POSHAN Pakhwada (Nutrition Fortnight) hman a ni.
He hun H.Lalchhan-hima, NSS PO kaihhruaiah hian C.Lalramliana, NSS PO leh Dr. Lalhmangaih-zuali Ralte, NSS PO-ten zirtirna an pe a, zirtirna petute chuan mitinte chu an taksa mamawh chaw ṭha an lak luh kawngah fimkhur a ṭul thu sawiin, tui tih zawng leh ei châk zawng chauh ei lo-in, taksain a ṭhat pui turte chauh ei leh in a pawimawh thu an sawi a, ei tur ṭha tlak chham (Malnutrution)-in a natna hrang hrang a thlen theihte an sawi a, hei bakah hian POSHAN Pakhwada-in a tumte leh hemi hnuaia hmalakna an lo neih tawhte sawilan a ni bawk a, NSS Volunteer-te chu midangte hnena taksa-in a mamawh ei tur ṭha ei pawimawhzia zirtirna pe ṭhin turin an chah a ni.