Dr R Lalthangliana chuan PATH (USA)-in a thlâwna Mizoram a pêk Genome sequencing laboratory chu ZMC/VRDL-ah bun fel tawh niin trial run ṭum 3 neih tawh ni mahse reageant/kit dik tawk loh vangin a la hlawhtling lo tih a sawi a, “Hei vang hian Genome sequencing hi tih ṭan a la ni lo. Tunah hian reageant/kit thar leh technical specialist-te lo thleng mai tura beisei a ni,” a ti.
MNF member Dr ZR Thiamsanga & Zothan-tluanga te zawhna chhângin nikum January 16 aṭanga kumin February 16 thleng khan Mizoramah vaccine la tawh hi 1st dose 804336 (94.41%) niin 2nd dose la 639364 (79.49%) an awm tawh a, first done la aṭanga chhutin 2nd dose la hi 76.49% an ni. Vaccine pek tawhah motor luh theih lohna hmunah a kalpui chak theih loh laiin network ṭhat loh vangin hmun ṭhenkhatah harsatna a awm tih a sawi a, sakhuana avang leh social media-a thu dik tawk lo thehdarh avangin vaccine la duh lo an awm tih a sawi bawk.
MNF member C.Lalmuanpuia zawhna chhangin minister chuan ministry of science & technology aṭanga dawn mobile I-Lab chu hman ala ni lova, “Mobile I-Lab van test nei tur hian buaipui ngai tam tak a awm a, ICMR approval lak a ngaih bakah Bio-Medical Waste Management tifel turin hmalak mek a ni. Test tih theihna tura mamawh hrang hrangte lakkhawm mek zel a ni a, thawktu tur Microbiologist leh Laboratory technician te pawhin training an nei mek a ni,” a ti.
Japan nena thawh dunna tur (JICA) – Project Establishment of Mizoram State Super Speciality Cancer Hospital & Research Centre, Zemabawk chu ruahmanna kalpui mek a ni tih a sawi a, “JICA mi leh sa ten bulṭanna atan preparatory survey nei mekin project amount chu cheng vaibelchhe 500 a ni a, he project-in a tum ber chu Aizawl-ah Mizoram state super speciality cancer & research centre din a ni,” a ti.
Dr.K.Pachhunga zawhna chhangin Mizoram thingtlang hriselna tih hmasawnna kalpui turin sub cente 183 chu health & welness centre-a siam a ni tawh a, he scheme hian PHC zawng zawng, Urban PHC telin leh Sub Centre PHC awm lohna khuaa mite chauh a huam tih a sawi.