Nimin khan Governor Hari Babu Kambhampati chuan Ailawng ram chhunga Zopar Export Pvt.Ltd-in a enkawl mek Pangpar Huan leh Reiek Tlang a tlawh.

Nimin Pangpar Huan leh Reiek Tlang a tlawhnaah Governor Hari Babu Kambhampati chuan Mizoram chu a mawi em em a ni tih zep rual a ni lo a, a leilung bakah state chhung sik leh sate chu Theirah leh Pangparten an ngeih em em tih a chiang a, hei hi sumdawnna ang hawiin kan belhchian a ngai a ni a ti.

Governor chuan Mizo ṭhalai zingah entrepreneur ṭha tak tak an awm tawh a, kan ṭhalai thluak ṭha leh a ngaihna hriate hian Tourism, Horticulture leh Floriculture huangah sum tam tak a awm a, state tan sum tam tak an thawk chhuak thei tih hria se a duh thu a sawi a ni.

Horticulture, Floriculture leh Tourism huangah hian kan sumdawng hausate leh pawisa ngah deuhte pawhin sumdawnna nei ṭan se, Mizoram tan sum hnâr ṭha tak a awm thei dawn a ni a ti a, sumdawnna leh khualzin hip turin state mipui te rilru inhawn pawimawhna a sawi tel bawk a ni.