Zothlifim Logo
Loading ...

Horticulture department changtu chief minister Zoramthanga chuan maua thil siam chhuah hrang hrang hmangin intodelh tum a nih thu a sawi.

Nimina Assembly session-a zawhna leh chhanna hunah CM hian Congress member C.Ngunlianchunga zawhna chhangin, “Mau/rua hmanga thilsiam hrang hrang – agarbati stick, bamboo handicraft, bamboo timber, bamboo plyboard, bamboo charcoal, cutlery items etc tih chhuah a, heng thil siamchhuah hrang hrang hian intodelh leh ram economy pawh chawikan tum a ni,” a ti a, tun thlengin mau chi 334,425 supply tawh a nih thu a sawi.

Congress member dang Lalrindika Ralte zawhna chhangin bamboo plantation atan Mizoram sawrkarin cheng nuai 877.575 a sêng tawh a, mahse maute hi chin ṭan chauh a la nih avangin a hralhna tur lam ngaihtuah a la nih loh thu leh mau chin chu Mizoram sawrkarin a hlawhtling thawkhatah a ngaih thu a sawi.

Hnahlan, Champhai leh hmun hrang hranga grape chingtute tan sawrkarin ruahmanna hranpa a la siam lo tih ZPM member VL Zaithanzama zawhna chhangin a sawi a, CLP leader Zodintluanga Ralte zawhnaah oilpalm chu Mizoram-ah nasa zawka ching tura hmalakna a awm lo tih a sawi a, “Kum 2005 aṭanga kalpui dan kha a pangngaia la kalpui reng,” a ti a, central aṭangin oilpalm ching tura nawr luihna a awm loh thu te, nasa lehzuala oilpalm ching tura ṭanpuina a dil loh thu a sawi bawk.