Zan khat riaka Mizoram rawn tlawhtu Ports, Shipping & Waterways changtu Union Minister Sarbananda Sonowal chuan nimin tlai khan SAD Conference Hall, MINECO-ah Mizoram chhunga lui liante cheibawl a, inkalpawhna inland water way siam dan tur an rel a, he meeting-ah hian Transport Minister TJ Lalnun-tluanga, Chief Secretary Dr.Renu Sharma leh mi pawimawh dangte an tel a ni.
Sarbananda Sonowal chuan Mizoram chhunga lui hmanga inkalpawhna (inland waterways) siam a nih theih nan sawrkar laipui leh Mizoram sawrkarin thawh-hona ṭha zawk an neih theih-na tur ngaihtuahho a nih thu a sawi a, Mizoram sawrkar-in hma a lâk tawhna leh project hrang hrang an neihte uluk taka a ngaihthlak thu leh heng hmalakna hrang hrang te hi reiloteah ṭha taka bawhzui a, bungrua leh khualzin mite phurhna turin ṭangkai taka hman thuai theih a nih a beisei thu a sawi a ni.
Prime Minister Naren-dra Modi chuan hmarchhak state-te hmasawnna a dah pawimawh hle tih, Sarbana-nda Sonowal chuan a sawi a, a sawrkar tirh phat aṭanga tun thlengin Mizoram leh hmarchhak State dangte kawng tinrenga hma an sawn theihna tur a ngai pawimawh a, kawng tam takah hmasawnna hmuh tur a awm mek zel a ni, a ti a. Union Minister chuan India ram hmasawnna leh into-delhna turin state tinten hma an sawn a ṭul a, Mizoram hmasawnna tura sawrkar laipuiin project leh scheme tam tak a siamte pawh dik tak leh ṭangkai taka hman a nih ngei a beisei thu a sawi a. Mizoram chu lehkha-thiam tamna State, mipuite pawh changkang leh hmabak eng tak nei an nih ang ngeiin sawrkar laipui hmalakna kaltlangin state sawrkar leh Mizoram mipuite thahnemngaihna nen, India rama state hlawhtling ber zinga chhiar tel an nih thuai a beisei thu a sawi a ni.
TJ Lalnuntluanga chuan Mizoram mamawh chaw lût turin kawngpui pawimawh pakhat chauh kan neih avanga harsatna state-in a tawh fo thu leh Mizoram chhunga lui lian te cheibâwl a, bungrua leh mamawh dang lâkluhna atan mai bakah mipui zin veivak te chhawr ṭangkai theih turin inland waterways siam a ṭulzia a sawi a, Mizoram sawrkarin lui lian tak tak a neihte inkalpawhna atana cheibawl a nih theihna tura sawrkar laipuiah rawtna a lo siam ṭhin thu te, Union Minister Sarbananda Sonowal ṭhahnemngaihna avanga chak taka bawhzui mek a nih thu a sawi bawk.
Transport Secretary KT Beichho chuan Mizoram sawrkarin Inland Waterways project hrang hrang a neihte chipchiar takin he meeting-ah hian a tarlang a. Khawthlangtuipui (Karna-phuli) – Tuichawng (23 kms) atana DPR thehluh chu sawrkar laipuiin a pawm tawh thu te, a thawh khatna atan Central Sector Scheme hnuaiah cheng vaibelchhe 6.17 ruahman a nih thu te, advance installment cheng vaibelchhe 1.23 chu Mizoram sawrkar sum bawma a luh thuai theih nan January 12, 2022 khan Chairman IWAI hnenah ngenna thehluh a nih tawh thu a sawi bawk. Tlawng luiah Khamrang khua aṭanga Assam state chhung Ghar-mura kalpawh theihna tur 87.136 km a thui siamna turin survey neih a ni tawh a, he survey report aṭang hian DPR siam niin, IWAI Chairman hnenah thehluh a ni tawh bawk. Tuipui D aṭanga Lom-asu inkalpawh-na tur 138.26 km a thui chu final proposal thehluh hmabak a ni a. Khawthlangtuipuiah Rajiv-nagar khua atanga Tui-chawng khua (128.08km) inkalpawhna tur proposal thehluh a ni tawh bawk.
Meeting-ah hian Kaladan Multi Modal Transit Transport Project thlen chin leh hmabakte report a ni bawk a. sawrkar laipui aṭangin Inland Water Transport Senior Adviser Sunil Kumar Singh chuan report a pe a, Mizoram sawr-kar aiawhin PWD SE (Southern Circle) Vanlal-dika’n report a pe bawk.