Nimin khan ZPM Chhung Inkhawm leh mi thar lawmluhna hun hman a ni a, Prof. Lalnilawma, HoD, Dept. of Extension Education & Rural Development, MZU leh KC Lalnunngheta, Dinthar, Aizawl (congress unit hruaitu hlui) te chu Lalliansawta, President-in ZPM-ah a lawmlut a, Lalliansawta chuan thu sawiin, “Kan ram leh hnam tana mi thiam leh hming tha tak tak ten ZPM an rawn zawm hian chhan bulfuk tak a neiin ka hria a, kan mithiamte thinlungah ram siam duhna tak tak a len tawh zia a tarlang chiang hle a ni,” a ti.
Prof. Lalnilawma chuan ZPM a zawm chhan sawiin, “ZPM hi hmasawnna tluantling (sustainable development) min neih tir theitu tur party nia ka rin avang te, retheihna ata Zoram khai chhuak theitu tur nia ka rin avang te, mipui sawrkar dik tak siam theitu tur nia ka rin avang te, zirchianna (research) hmangin thil a kalpui dawn nia ka rin avang te, party mi leh mi lo thliar lova mipui sawrkar a nih angin tanpuina mamawhtu apiang a tanpui mai dawn nia ka rin avang tea zawm ta ka ni,” a ti.
Chhung Inkhawm hi Dr. Kenneth Chawngliana, Vice President-in a kaihruai a; Upa K. Lalrinsiama’n hunserh a hmang a; General Headquarters hruaitute leh party mite an tel a ni.