Commerce & Industries Minister Dr. R.Lalthangliana leh Tipu Munshi, Minister, Ministry of Commerce, Bangladesh-te chuan Inrinni khan Silsuri – Sajek Border Haat siamna tur hmunhma leh India leh Bangladesh insumdawn tawnna atana Integrated Check Post (ICP) dinna tur hmun, Kawrpuichhuah, Tlabung an tlawhdun.
Silsuri – Sajek Border Haat leh Integrated Check Post dinna hmun tur Kawr-puichhuah an tlawhnaah hian Bangladesh Commerce Minister chuan thu sawiin Mizoram nena insumdawn tawnna tihhlawhtlin chu Bangladesh sawrkarin a ngai pawimawh takzet a ni tiin, “ICP Kawrpuichhuah leh Silsuri, Tuipuibari, Nunsuri leh Marpara-a Border Haat-te an nih tur anga tihpuitlina kalpui an nih theihnan Bangladesh sawr-karin kan tih ve tur te rang thei ang bera umzui kan tum a ni,” a ti a. Ramri inṭawm kan nih angin inhriatthiam tawnna boruak ṭha hnuaia hmalak tlan zel a ṭul a ni tiin insumdawn tawnna kalpui chuan inlaichinna ṭha zawk a thlen ngei pawh a rin thu a sawi a. Mizoram thar chhuah balhla, hmarcha leh Mizorama tam em em lung (boulder)-te Bangladesh chuan a mamawhin a lei duh reng a ni tiin, Mizoram border tour hlawhtling tak a neih chungchang chu Bangladesh Prime Minister Sheikh Hasina hnenah report thuai a tum thu a sawi.
Dr R.Lalthangliana pawhin thu sawiin, kan ram economy ṭhan len zelna turin ram dang nena insumdawn tawnna tihhmasawn a pawimawh takzet a ni tiin, hemi kawnga kan hmasawnna turin Bangladesh leh Myanmar ramte nena ramri kan neihna hmunahte border trade tihlawhtling turin theihtawp kan chhuah zel dawn a ni, a ti a, ICP leh Silsuri, Tuipuibari, Nunsuri leh Marpara-a Border Haat te chu a nihna ang tur takin kan chhawr ṭangkai theih thuai a beisei awm a ni, a ti a. Myanmar lam ramri depa border trade pawh Myanmar ram boruak a ziaawm chhoh veleh ngawrh taka kalpui tum a nih thu leh tun dinhmunah Zokhawtharah cheng nuai 1500 man hu project kalpui a nih thu a sawi a. Border trade tihlawhtling turin ramri hrula cheng mipuite an pawimawh takzet a ni tiin, he hmalakna hi mipuiten ngai pawimawh tur leh sawrkar ṭawiawm turin a sawm a ni.
Minister pahnihte hian Inrinni khan Silsuri – Sajek Border Haat siamna tur lungphum an phum nghal a, Bangladesh ram chhung Udaipur thleng Border Haat hmunhma enfiahin an kal a, ram pahnihte insum-dawntawnna tur Chittagong to Aizawl inkar kawng hlat zawng hi Kms 394 a ni.
ICP Kawrpuichhuah dinna tur hian kum 2005 khan M/s Rites Ltd. (Government of India Enterprise) ten Home Ministry hnenah an survey report thehlutin he ICP dinna tur hian ram 224.99 bigha a zau acquire a ni a. India leh Bangaldesh inkalpawhna tiawlsam tur hian Kawrpui lui (Theka)-ah RCC Double Lane Bridge 660 metres a thui siam tum a ni bawk a, Tlabung leh Kawrpui-chhuah inkar kawng 18km chu double lane black topping siam zawh a ni tawh bawk a, Trade Facilitation Centre chu Tlabungah sak zawh tawh a ni a, he ICP puitlinna tura pawimawh tak Lunglei leh Tlabung inkar ah kawngpui (Double Lane) 100kms chu survey zawh tawh niin hna bul ṭan tawh a ni.