Skip to content
Home » Chanchinthar » Serchhip Police-ten Heroin hawng 103 leh a kaihhnawih mi 5 man

Serchhip Police-ten Heroin hawng 103 leh a kaihhnawih mi 5 man

Zirtawpni zan dar 11 vel khan Tuichang leh Keiṭum inkarah Serchhip Police-te chuan an thudawn bawhzuiin, Heroin No. 4 Hawng 103 an man a, hemi kaihhnawihah hian mi 5 an man tel.

Serchhip Police-ten Heroin No. 4 kaihhnawiha an mante hi – C.Cherthanga (27) leh Zosangzuala (29) Vengchhak, Tuikhurhlu ve ve, Lalrindiki (34), Aizawl Road (Field Peng) Seling; Lallianzuali (37), Venglai, N.Vanlaiphai, leh Lalruatdika (29), Saron Veng, Serchhipte niin, Serchhip Police-te hnen aṭanga thudawn danin, heroin an man zinga Hawng 70 hi Serchhipa hralh tura ruahman niin, a bak hi chu Serchhip chhehvel leh khaw danga hralh tura ruahman a ni a, heroin phurhna lirthei Alto 800 pawh man tel a ni bawk a, an mi mante hi Inrinni khan court-ah hruai nghal niin, heng ruihhlo-te hi Ṭiau aṭangin, ramri kânin Ngharchhip daiah a latu turte hnenah hian an rawn pe niin an sawi.

Tun dinhmunah heroin hi tualchhunga a hralhna, a tlem thama an zawrhna rate aṭanga chhut chuan, hawng khat an hralhna hi ₹30,000 vel bawr a tling tur anga chhût a ni a, chutianga chhût chuan tuna heroin an man hi ₹30,90,000/- man hû vel a ni a, hawng khat hi Myan-mar ramri-a an laknaah chuan ₹20,000/- bawr velin an la niin hriat a ni.

Zothlifim zawhna chhângin Serchhip Police Station OC C.Lalremthanga chuan Serchhipah hian heroin a hawnga regular taka chawlut ṭhin hi mi 4/5 vel an awm nia an hriat thu leh, remchang hmuha a hawnga chaw lut ve ṭhin 2/3 vel an awm bawk nia an hriat thu sawiin, heng mite aṭang hian Serchhipa damdawi ti ṭhinte chuan a tlem thamin, a can leh a chhinsen angin an zuar chhawng leh ṭhin tih a sawi a, ruihhlo avang hian rukruk a tam phah nia a lan thu pawh sawiin, nitin rukruk case hi chawhrualin 2 vel zel an hnena lut awm ang a nih thu leh heng rukrukte hi heroin nen a inkaihhnawih deuh zel tih a sawi bawk.

Leave a Reply

This site uses Akismet to reduce spam. Learn how your comment data is processed.