Skip to content
Home » Chanchinthar » BJP Mizoram State president-in new Delhi-ah Union Minister pahnih Mizoram mamawh a sawipui

BJP Mizoram State president-in new Delhi-ah Union Minister pahnih Mizoram mamawh a sawipui

BJP Mizoram State president Vanlalhmuaka chuan New Delhi-ah Union Minister pahnih – Fisheries, Animal Husbandry and Dairy changtu Parshottam Rupala leh Railways and Textiles changtu Darshana Jardosh-te hmuin Mizoram mamawhte a sawipui.

Nimina BJP thuchhuah tarlan danin, Parshottam Rupala nen Pathianni zana an inkawmnaah Vanlalhmuaka chuan Mizoram chu Sangha khawi leh ran vulh lamah scope a ṭhat thu a sawipui a, vawkpul hri leng avanga Mizorama vawk vulhtuten an vawk an chân nasat thu lehkha thawna alo hrilh tawh chu hrilh nawn lehin, zangnadawmna an hmuh ngei theihna tura hma lakpui zui zel tur leh, Mizoram chu vawksaa intodelh tura hma lakpui turin Minister chu a ngen a, sangha khawi leh bawng vulh lamah Mizoram chu intodelh tura hma lakpui turin a ngen bakah Mizoram tlawh turin a sawm bawk a ni.

Rupala chuan Mizorama vawkpul hri avanga vawk vulhtuten harsatna an tawhnaah Mizoram sawrkarin alo thlen tawh angin ṭanpui zel a tum thu sawiin, vawk vulhtuten zangnadawm-na an dawn kawngah lo enzui pui turin Vanlalhmuaka chu a lo ngen bawk a, Mizoram mipuite a puih theihna atan kawng hrang hranga thurawn pe turin Vanlalhmuaka chu a lo hrilh bawk a ni.

Nimin khan Mizoram tlawha rawn zin tur Darshana Jardosh chuan Vanlalhmuaka hi a office-a thingpui in turin a sawm a, he hunah hian Mizoram BJP president chuan Mizoram chhunga Railway hnathawh dan tlangpui leh Textiles Industry lama Mizoram dinhmun a sawipui a, Thenzawla puantahna hmunpui a tlawh tur chu thil lawmawm tak a nih thu hrilhin, puan tahtute harsatna chu a hmun ngeiah hmuhpuia ṭanpui ngei turin a ngen a ni.

Darshana Jardosh chuan Mizorama a kal tur chu a phur thu leh, Vanlalhmuaka thu thlente chu a ngaih pawimawh tur thu hrilhin, Mizoram a tlawh hunah pawh a Ministry hnuaia hmalakna hrang hrangte leh an dinhmun enfiaha zirchian a, theihtawp chhuaha puih a tum thu a hrilh a ni.

Vanlalhmuaka hi National OB Meeting an neih zawhah Delhi-ah cham zuiin, Mizoram mamawh hrang hrangah Union Minister-te hmua Mizoram mamawh te sawipui zel a tum tih BJP Mizoram thuchhuah chuan a tarlang.

Leave a Reply

This site uses Akismet to reduce spam. Learn how your comment data is processed.