Nimin khan District Institute of Education and Training (DIET), Serchhipa Training mek 2nd & 4th Semester-te hmawrbawkna atana inelna ni 3 awh neih chu khar niin, a pual inkhawm Lalrammawi DIET Principal kaihhruai inkhawmah Serchhip District MJA President C.Lalhminghlua’n khuallian niin a hmanpui.
He hun Serchhip Chan-mari Vengthara DIET Conference hall-a hmanah hian khuallian chuan thu sawiin, tunlai khawvel chu tharum ni lo, thluak hmanga eizawnna a nih tawh avangin, chuta tan chuan zirna chu a pawimawh ber a ni a ti a, lehkhathiam lo chuan mi hriat ang hre lo leh mi phak tawk lohna neia an inhriat avangin mahni inrintawkna an tlachham a, chutiang midangte finna pe thei tura thawk zirtirtute chu an ropui a, an ropuina chu an hlawh tam lamah leh an in leh lo ṭhat lamah a innghat lo a ti a. Naupang an zirtirnaah ṭawngkama an zirtir bak an nun thlengin zirlaiten zirtirtute chu an chikin an zir tel avangin an file chu lehkha ni lovin mihring a ni a, nun uluk a ngai bik em em a ni a ti.
Khuallian chuan DIET a Pre-Service training mek te chu an zir chhuah hunah zirtirtu hna hmua ṭha tak leh entawntlak thawktu ni ngei turin duhsakna a hlan a ni.
He hunah hian zirlai chhuakte fuihna thuchah Principal Lalrammawia’n a sawi bawk a ni.
Serchhip DIET hi kum 16 kalta kum 2006 khan Mini DIET tia din a ni a, kum 2013 khan DIET puitlingah hlankai a ni a, tun hmaa zirtirtu ni mekte training an pek ṭhin chu kum 2016 aṭang khan zirtirtu la ni lo, ni tura inbuatsaihte Pre-Service training pe theia siam a ni leh a, Training course khat hi kum hnih niin, tun ṭum training nei mekte hi course thumna a ni a, course khata training-te hi mi 100 bawr vel an ni ṭhin a, tuna training mekte hi mi 93 an ni.
He huna tel MJA hruaitu dangten intihsiaknaa tiṭhate hnenah lawmman an sem bawk a ni.