Local Administration Department (LAD) Minister K.Lalrinliana hovin National Panchayat Awards 2022 lawmna hun Aijal Club-ah neih a ni.

Sawrkar laipui Ministry of Panchayati Raj chuan rampuma Panchayat/Village Councilte tan kumtin category 4-ah National Panchayat Award a sem chhuak ṭhin a, kumin 2022 hian Mizoram aṭangin Leng, Maubuang, Thingsul Tlangnuam leh Sawleng Village Council-ten he lawman hi an dawng a ni.

LAD Minister chuan thingtlang khaw tinten kawng hrang hrangah chak leh zuala hma an sawn theihna turin tualchhung inrelbawlna leh hmasawnna ngelnghet siam kawnga pawimawh em em Village Council (VC)-te fuihna atan National Panchayat Award hi sawrkar laipuiin a buatsaih a ni, a ti a. National Award dawng pha hial khawpa thawk ṭha VC-te a lawmpui tak zet tih sawiin, award dawng thei tura ṭan la thar theuh turin Mizoram chhunga VC zawng zawngte a chah a ni.

Sawrkar laipui aṭanga hmasawnna hna thawhna tur sumfai lo kalte chu VC tinah sem a ni ṭhin a, a hman dan tur a huhoa rel turin VC ṭhenkhat chuan vantlang inkhawm Gram Sabha an kalpui ṭha lo ṭhin chu pawi a ti a, khaw mipuite lungawina zâna hmasawnna hnathawhna tur sum hman dan tur Gram Sabha hmang hian sawitlang a, kalpui a nih chuan inlungrualna a thlen a, insawiselna pawh a tlem, a ti a, Minister chuan Vantlang rorel inkhawm Gram Sabha hi Central leh State Sawrkarin a ngai pawimawh a, dan pawhin neih ngei ngei tura a phut a nih avangin Gram Sabha hi Mizoram chhunga VC zawng zawngin an kalpui ngei ngei a ngai a ni, a ti.

Deen Dayal Upadhyay Panchayat Sashakitakaran Puraskar Award chu Leng leh Maubuang Village Council-ten an dawng a, hei hian sumfai cheng nuai 5 leh citation a keng tel a, Leng khua hian civic services theme-ah lawmman hi an la a, Maubuang VC hian sanitation theme-ah an dawng thung.

Nanaji Deshmukh Rashtriya Gaurav Gram Sabha Puraskar award hi khawtlang leh tualchhung ei leh bar hmasawnna thlen tura ṭangkai taka vantlang rorel Inkhawm (Gram Sabha) nei ṭha VC-te hnenah pek a ni a, he lawmman hi Leng VC-ten an dawng a. Pawisa fai cheng nuai 10 leh citation a keng tel a ni.

Gram Panchayat Development Plan Award (GPDPA) chu khaw hmasawnna tura ruahmanna Village Development Plan siam ṭha ber hnenah pek ṭhin niin kuminah hian Thingsul Tlangnuamin an dawng a, pawisa fai cheng nuai 5 leh citation a keng tel a ni.

Sawleng Village Council chuan Child-friendly Gram Panchayat Award an dawng a, naupangte hriselna leh hmasawnna tura thawk ṭha hnenah he Award hi hlan a ni a, pawisa fai cheng nuai 5 leh citation a keng tel a ni.

Ngopa RD Block chuan Best Performing Block for People’s Plan Campaign 2021 an dawng bawk a, GPDP siam tura Gram Sabha vawi engemawzat koh niin, portal-a report leh data upload bakah Azadi ka Amrit Mahotsav lawmna atana kawng hrang hranga hma la ṭha an nih avangin Ngopa Block hnenah LAD chuan lawmman memento leh pawisa fai ₹20,000/- a hlan a ni.