Mizoram sawrkar hnuaia Finance Department chuan kum 2022 – 2023 chhunga hman tur Budget-a sawrkar hnathawkte hlawh a kum hmasa aia dah tlem thuah mi ṭhenkhatten thil an hriat kim loh deuh hlek a awm nia sawiin sawifiahna a siam a, tuna budget-a hlawh tur dah hian a daih ngei tura chhût a nih thu an sawi.
Finance Department chuan sawifiahna an siam-ah chuan Budget buatsaih dawn hian Department tinah an hlawh mamawh zat tur hisap chu Finance Department-ah pe tura hrilh vek an ni a, hetah hian a tlangpuiin Department-ten an venthawn leh ṭhahnem ngaihna avangin an pe tam hle ṭhin tih an sawi a, a tlangpuiin hlawh tura Budget-a dah hi hman sen a ni ngai lo tih sawiin, kumin kum kal ta 2021-2022 kum chhunga hlawh tur Budget-a dah pawh kha tuna chhût chhuah tawh chinah chuan cheng vaibelchhe 336 zet hman zawh lohin a awm tih an tarlang a, hei hi chhut chhuah kim vek hunah phei chuan cheng vaibelchhe 400 chuang zet tling tura ngaih a ni an ti bawk.
Hetiang hi a nih avangin Budget buatsaihtu Finance Department chuan kum 2022-2023 Budget-ah chuan chutiang chu a nih tawh loh nan a tak taka mamawh zât tur hisapin Budget-ah hian hlawh tur a dah ta tiin an sawi a, tuna Budget-a hlawh tur dah hian daih ngei tura chhûta dah a nih thu tarlangin, Budget siam laia la awm lo mamawh thar lo thleng palh a awm a nih pawhin chungte pawh chu a mamawh ang zela pek tura inruahman zel a nih tur thu an tarlang bawk.