Hachhek Bial Kuhva Chingtu Pawl (HBKCP) Executive Committee chuan ramdang aṭanga Kuhva lo lutin an eizawnna kawnga harsatna a siamsak mek chungchang sawi hovin, Central YMA-in hun remchang a siamsak thei a nih chuan dawhkan khat kil hova, inbiakna mumal tak neih an duh thu an sawi.
HBKCP Executive Committee hi nimin khan Kawrthah North Recreation Hall-ah an ṭhukhawm a, Myanmar lam aṭanga Kuhva Rah ro Dan lova lut ṭhin chungchang leh Central YMA hmalakna an thlir hova, hun remchang a awm thei a nih chuan Mamit Sub-Hqrs YMA Rorel inkhawm, vawiina neih turah CYMA hruaitute nen hmaichhana inbiak ngei ṭha tiin, CYMA lamin hunâwl an siamsak thei a nih chuan a hmu tur hian President leh Secretary te an ruat nghal a ni.
HBKCP chuan State dang aṭanga Kuhva chi/ Polypot lo lut ṭhin chu Kuhva tâm thlentu pakhat nia ngaiin an ngai thutak hle a, hetihlai hian Hachhek Bialah SEDP aṭangin Kuhva chi hmundang aṭanga tam tak tawlh luh a ni chu pawi an tih thu an sawi a, khaw hrang hrang Association/Society-te pawh State dang aṭanga Kuhva chi lâkluh kawngah a tâm hri leh chi ṭha lo dang lakluh theih a nih avangin fimkhur ṭheuh turin an inhriattir nghal tih an sawi a ni.
An kuhva enkawlna turin leiṭha leh thil dang sawrkar lama dil leh tun dinhmuna an harsatna tawh mek, nipuia thar ṭhin Kuhva rah hralhna kawnga harsatna an tawh mek chungchangah Mamit-a sawrkar thuneituten hma an lakpuina chu lawmawm an tih rualin tun thlenga Kuhva rahte an la hralh chhuak thei lo chu mangan thlak an ti tih an sawi a, an harsatna chu sawrkarin hriatpui ve ngei se tiin an hmalakna chu chak zawka kalpui chhunzawm zel ṭha an tih thu thuchhuah siamin a tarlang.
Nipui Kuhva rah hralh kawnga harsatna an tawh chhan hi Hachhek Constituency aṭanga Kuhva thar Assam-a lakluh ṭhinah, Thlasik/Ṭhal Kuhva bik atana Agreement a tawp avangte, Assam Chanchinbu lamah ‘Foreign origin nia rinhlelhawm tak’ an tih avanga Mizoram aṭanga Assam lama lakluh khapna thupek a awm vang niin an sawi a ni.