Zothlifim Logo
Loading ...

Aizawl Deputy Commissioner Office leh Central YMA ṭangkawp buatsaihin, India Independence Day Vawi 75-na pualin hmankhat daih sarang chungchang inzirtirna hun Vanapa Hall kawtah hman a ni.

He hun hi AMC Deputy Mayor R.Thanglura’n a hmanpui a, he hunah hian Branch 14- atangin mi 20 theuhin Vanapa Hall kawt panin an intawk khawm a, Branch aiawh kal te hian hmankhat daih sarang chungchang inzirtirna thuziak tawi (placard) thawhchhuahpuiin hmankhat daih sarang hmanglo tura intiamna leh midangte zirtir tura intiamna thuchham a nei bawk.

Aizawl Bawrhsap Dr. Lalhriatzuali Ralte chuan ram leilung leh hnam humhalh kawngah mitinin mawhphurhna an nei ati a, ram leilung ti chhe thei hmankhat daih sarang do kawngah sawrkar leh CYMA ten hma an lakna hi hlawhtling tur mipuite tanrual a ngai ati.

State Pollution Control Board Member Secretary Lalduhawma pawhin thu sawiin sarang 120 micron aia pan hman phal a nih tawh loh thu sawiin, a awlsam zawng chuan sarang hrim hrim pan tak anga ngaih pawh dan in hman a phal tawhlo a ni, a ti a. Sarang thlakna tur atan puan hman uar ni se, a thlakna tur ngaihtuah kawngah rilru seng thiam entrepreneur tam tak an awm a, mipuiten zawhna an zawhfo sarang thlakna tur chu sarang hman anih loh hunah a lo piang mai ang a ti a. Sawrkar in dan a siam zawm hi thil finthlak tak a ni a, khua leh tui tha nihna a ni, a ti bawk a ni.

He hunah hian AMC, UD&PA, Rural Development Department aiawh leh midangte an tel a ni.