Indian Institute of Mass Communication (IIMC) Regional Centre Aizawl sawmna angin nimin khan Information & Public Relations Department officer, PB Lianthangpuii, Jt. Director leh Pratap Chhetri, Dy. Director te chuan IIMC Regional Campus, MZU Tanhrila journalism zirlai nau-pangte chu inkawmhona hun Interactive Session an neihpui a, IIMC Lab Journal “IIMC Express” chu PB Lianthangpuii’n a tlangzarh nghal a ni.
IIMC zirlaite nena an inkawmho-naah hian PB Lianthangpuii chuan zirlai naupangte chu fuihin, ṭhalaiten rilru zawng zawng an pek phawt chuan eng hna pawh thawk se, hna ṭha leh hna zahawm a ni thei a, a pawimawh ber chu rinawmna leh tihtak takna a ni, a ti a. Tunlai India ram media-te hnathawh dan chu hmanlai nen tehkhinin a danglam nasat tawh tih sawiin, media leh chanchinbu mite chu mipuite thlavang hauhva, democracy vawnghimtu leh khaidingtu pawimawh ‘fourth pillar of democracy’ anga ram rawngbawltu an ni ṭhin a. Tunah chuan mi thiltithei tlemtein media hi politics hmanrua leh sumdawnna atan an hmang nasa ta hle niin a lang a, IIMC zirlaite chu an zir chhuah hnuah sawrkarah emaw, corporate sector leh media lama an thawk a nih pawhin an hnathawhna leh awmna hmun apiangah rilru nghet tak pu a, thil ṭha zawk tur atan chuan mite duhsak loh leh mal tlat pawh huam zel turin a fuih a, India ram media kalphung thlak danglam tura huaisen taka hna thawk turin a chah a ni.
IIMC Regional Centre-a Regional Director LR Sailo chuan IIMC Regional Centre chungchang sawiin, PB Lianthangpuii leh Pratap Chhetri te chuan Mizorama media leh chanchinbute hnathawh leh kalphung chungchang leh I&PR Department hnathawh dan chungchanga zawhna an neihte chu chhangin sawihona hun an hmangho a ni.
IIMC Regional Centre hi kum 2011 a din niin zirlai 70 velin Diploma Course in English Journalism an lo pass chhuak tawh a ni.