Mizoram hmun dang angin Kolasib District chhunga kuthnathawktute chuan tunlai hian thlai eichhetu rannung chi khat ‘Fall Armyworm’ vangin harsatna an tawk tih hriat a ni a, Kolasib DAO hmalakna in FAW vanga harsatna tawk kuthnathawktute chu DAO office, Thingdawl leh Bilkhawthlir Block Agriculture Office-ah an in-report a, nimin tlai thleng khan kuthnathawktu 379 an in report tawh.
Hriat theih chinah Kolasib DAO office-ah mi 48; Thingdawl DAO office-ah mi 70 leh Bilkhawthlir DAO office-ah mi 261 an in report tawh a, FAW vanga harsatna tawktute hnenah hian Agriculture department a thawktute chuan an mamawh dan a zirin rannung thahna hlo an pe chhuak zel a ni.
Mamit ah chuan District Agriculture Complex-ah Vaimim eichhetu Fall Army Worm laka inven dan tur inzirtirna neih a ni a, a invenna hlo sem pahin a damdawi hman dan inzirtirna neih a ni.
Asst. District Agriculture Officer Vanlalhriati chuan kum 2019 aṭangin Mizoram-in FAW an hmelhriat ṭan tih a sawi a. Mamit District chhung Khaw 29-a Kuthnathawktu mi 600 velin he FAW avanga harsatna hi an neih tawh thu sawiin, Phengphehlep aṭanga insiam pangangte hian Vaimim an ei chhiat ṭhin avangin Vaimim hmuna Phengphehlep an hmu a nih chuan thah zel a ṭhat thu a sawi a, hetiang Phengphehlep tui/Pangang note hi Vaimim hnahah te a awm leh awm loh ngun taka en thlithlai ṭhin tur a ni a. Phengphehlep tui an hmuh chuan tihchhiat vek tur anih thu a sawi.
He hunah hian Mamit khawpui chhunga VC 6 te hnenah FAW thahna hlo leh Sazu tur sem a ni.