Food Civil Supplies & Consumer Affairs (FCS & CA) Director, Ramdinliani chuan petrol leh diesel-ah chiaina em em tur a awm lo thu sawiin, Guwahati-a mi by-road-a phurh tur a nih vangin a rawn thleng reng dawn tih a sawi a, IOCL lamin eirawngbawlna gas-ah pawh harsatna a awm an rin loh thu leh, buhfai din-hmun pawh a ṭhat thu a sawi.
Supply director chuan Lumding leh Badarpur inkara leiminin Assam leh Mizoram (Barak valley chhim lam zawng) mamawh (oil) lakluhna rel kawng a tihchhiat chu siamṭhat theih a nih hun tur hriatthiam a har tih sawiin, railway lam chuan thla khat chhung vela siamṭhat (restore) theih an inbeisei tih a sawi a, Mizorama oil lakluh ṭhinte chu Lumding leh Badarpur kaltlangin rela rawn phurh ṭhin a ni a, chungte chu Ramnagar oil depot, Silchar-ah a lo thleng khawm ṭhin a, tun dinhmunah Ramnagar oil depot-ah diesel chhekkhawl sa a tam a, petrol erawh a tam lo a, Diesel leh petrol-te chu Barak valley chhimlam zawng (Mizoram telin)-te chan tur chu Gauhati aṭangin by-road a lakluh tur niin, lakluh mek a ni tiin, “Chi-aina em em tur a awm lo, a rawn thleng reng dawn a, mahse a rawn thleng fan deuh dawn a ni mai, oil kan lakna a hla ta deuh a, chu mai chu a ni. Duhthawh thil thu a intlar vakvak a ngai hranpa lo, chiai vak tur a ni lo, a rawn thleng reng dawn,” tiin Supply director chuan a sawi.
A phurhna lamah Indian Oil Corporation Limited (IOCL) hnuaiah transporter ṭhahnemtak an awm tih supply director chuan a sawi a, IOCL lam chuan LPG lamah harsatna a thlen an ring lo a, Agartala-a bottling plant chuan Tripura leh Mizoram mamawh a chawm zo-in an hria a, buhfai lamah pawh Mizoram dinhmun a ṭha a, chhekkhawl sa a tam tawk tih a sawi bawk.