Hri lengin Sports infrastructure lama hmasawnna a dâl lo: TC Pachhunga, Vice Chairman, SYS Development Board
Mizoram Wrestling Association buatsaih, 5th Inter-District Wrestling Championship, 2022 leh Mizo Inchai title fight challenger zawnna chu Serchhip Indoor Stadium-ah nimin aṭang khan khelh ṭan niin, a hawnna hun hi chhun dar 1-ah hman niin, TC Pachhunga, Vice Chairman, Sports & Youth Services Developement Board chuan khuallian niin a hawng a, hawnna thu a sawinaah khuallian chuan hripui leng karah Sports minister Robert Romawia Royte hmalakna chak tak vangin nasa takin hma sawn a ni a, khelmual tam tak siam a ni a, hri lengin sports infrastructure lama hmasawnna tur a dal lo a ni, a ti.
Khuallian chuan sawrkarin sports a ngai pawimawh a, sport chu zirna kawngah subject dang ang bawkin a pawimawh tawh dawn tih sawiin, hemi kawngah hian sawrkarin chak takin hma la chho mek zel a ni, a ti bawk.
TC Pachhunga chuan Sports chu mi zawng zawng inlungrualna ṭha ber a ni, tiin, MNF sawrkar a lo din phat aṭangin, kum khatna aṭang khan Sports Minister tiam angin sport policy duan a ni a, hetiang a nih avang hian eizawnna tak takah a hman theih dawn a ni, a ti a. Sports discipline 33 zingah wrestling-ah national level-ah kan hnufum hle tih pawh a sawi a, hemi a nih avang hian ṭan a lak ngai hle tih sawiin, Grassroot level aṭanga ṭanlak a ngai a ti a, International leh National level-a lang tur chuan taksa a fit a ngai a, chumi tur chuan taksa enkawl ṭhat leh, ei leh in thlenga inuluk a ngai a ni, a ti bawk.
Khuallian hian Mizo-ram Wrestling Association-in a ṭul apianga an hman turin ₹10,000/- a pe a ni.
Mizorama chhung sports association hrang hrang zingah Mizoram Wrestling Association hi a ding hmasa ber a ni a, Mizoram chhunga Sports dicipline hrang hrang Mizoram State Sport Council leh Mizoram Olympic Association hnuaia inziak lut 33 an awm tawh a ni.
Inter-District Wrestling Championship 2022-ah hian Mizoram chhung hmun hrang hrang aṭangin wrestler 114 an fuankhawm a, mipa leh hmeichhia free style category hrang hrangah inelna an nei dawn a, Mizo inchai champion lai chotu tur zawnnaah hian mi 21 awmin, mipaah palian, palai hawl, pate leh hmeichhia Mizo inchaiah nulian, nulaihawl leh nute khelh a ni ang.
Tunah hian Mizo Inchai Palian champion lai hi Lalsangliana Upper Republic a ni a, palaihawl champion lai chu R.Lalrinawma, Excise & Narcotics Dept. niin, pate champion lai chu Lalchhanhima, Saitual a ni. Hmeichhe lamah Nulian champion lai hi Lalvenhimi, Khawhai niin, Nute champion lai chu Lalbiakdiki Serchhip a ni bawk.
He championship hawnna inkhawm hi MWA President, Zohmingthanga’n kaihhruaiin, Rev. Laltanpuia Colney, BCM Serchhip chuan hunserh a hmang a, MWA Gen. Secretary C.Lalhmunfela leh Technical Chairman F.Vanlal-siama-ten report an pe a ni.