Mamit District chhunga awm, Pukzing khawtlang hruaitute leh MZP Gen. Hqrs. hruaitute chuan Chakma leh Tuikuk khuate tana VC thar siam a nih avanga Pukzing ram sahthlak a nih loh nan hmalak an tum tih an sawi.
Nimin MZP Gen. Hqrs. President, Lalnunmawia Pautu leh hruaitute dangte chuan Pukzing khua hi an tlawh a, MZP chuan tunhnaiah Mizoram sawrkarin Pukzing Village Council ram satthlaa, a chhehvela Chakma khua – Silsuri, Hnahva, Hruiduk, Bekabeki leh Tuikuk khua Pukzing Vengtharte hnenah Pukzing ram sahthlaa pêk a tum vanga Pukzing khua hi tlawh an ni tih an sawi a ni.
Pukzing ram sahthlak chungchang hi MZP, Pukzing VC leh YMA hruaitute chuan sawihoin, Pukzing khawtlang hruaitute chuan VC ding tharte hnenah an khaw ram sahthlak an phal loh thu leh a tawp thlenga an do tur thu te, No objection pawh an sign dawn loh thute leh sawrkarin a pe lui a nih chuan thisen chhuah hial pawh an hreh dawn loh thute an sawi tih MZP thuchhuah chuan a tarlang a, MZP hruaitute pawh a ṭul anga thawhpui turin Pukzing VC-te chuan lo sawm nghalin, Tuikuk leh chakma khuate tana VC thar siam a nih avanga ram sahthlak a nih loh nan a ṭul anga hmalakho zel ni se an ti a ni.
MZP chuan, “Kan ram, kan hnam a him theih nana theihtawp chhuah a, hma a lo lâk tawh chu a chhunzawm zel dawn a. Hnam dang lakah kan ram kan chân zel loh nan leh kan ram a him zel theih nan hnam dangte tana ram sahthlaksak lo turin thuneitute kan ngen nghal bawk a ni. Hnam dangte ram sahthlak tumna hi tihtlang a nih chuan a tawp thlengin MZP chuan a dodal zel dawn a ni,” an ti bawk.