Nimin zing khan Kelsih khaw daiah puakthei leh ralthuam ṭhahnem tham tak bakah ralthuam phurhna atana pickup truck pahnih leh a lirthei neitu leh khalhtu ni bawk mi 2 an man.
Nimin zing lam dar 2:35 khan Assam Rifles-te’n ralthuam phur nia rilhlelh pickup truck pahnih an hren thu Kulikawn Police Station-ah dawn a ni a, Kelsih khaw daia pickup truck pahnih chu dapin puakthei thil leh ralthuam ṭhahnem tham tak an man ta a ni.
Puak thei thil an man hi gelatin bawm 55 a chhunga gelatin tlawn 24,000 awm a ni a, tlawn 13,000 hi ‘Neo gel 90’ a ni. Gelatin tipuak tura deh kaina hrui hi metre 2,000 vela sei man a ni a. Silai 8, licence awm lo man a ni a. Silai mante hi shotgun 3, sporting rifle 2 leh airgun 3, a vaiin 8 a ni a. Silaimu bawm 20 bakah silai zén bawm 4 (kg 100 vela rit) an man tel bawk. He’ng ralthuam phurtu a rinhlelh pickup truck neitu leh khalhtu ni bawk Lalbiak-tluanga, kum 42, Mualpui Bethel veng leh Zoremsanga, kum 42, Tlangnuam West te leh an lirtheite hi man an ni bawk a. Kulikawn Police Station-ah thubuai ziahluh a ni a, thu zawhfiah mek an ni.
He thil hi ngawrh taka chhui zui mek a ni a. Police-te chuan ralthuamte hi Myanmar lama phurh chhoh tur a nih an rin thu an sawi a, ralthuam hmanga sumdawnna a nih an rin thu an sawi bawk.