Hnahlan leh Champhaia grape chingtute chuan Mizoram sawrkarin Wine Rules a neih loh avangin an thil siam hralhchhuah kawngah harsatna an la tawk reng tih thu an sawiin, MNF sawrkar chu grape chin bul ṭantirtu an nih avangin beiseina an neihsan thu an sawi.
Hnahlan leh Champhai tlawhtu Zalen chanchinbua thawktute hnenah Grape Growers Society hruaitute chuan tun dinhmunah chuan hriatthiamnain an kal hrih nawk nawk tih sawiin rules mumal tak awm se an duh tih an sawi a.
Hnahlan Grape Growers Society chairman C.Vanlalhriata chuan, “Sawrkarin wine rules a siam loh avangin a zawrh kawngah harsatna kan tawk a. Excise, police leh sawrkar ten min hrethiam a; mahse, a ruk deuh reuh a zuar ang hi kan ni a, a buaithlak khawp mai,” a ti.
Champhai Grape Growers Society hruaitute pawhin, “State ṭhenawm, Meghalaya leh Arunachal Pradesh ah pawh kan grape hralhna tur hi kan hmu a; mahse, export pass a ngai si a, eng rules aṭangin nge pek tur tihah buaina a awm avangin state pawnah pawh kan thawnchhuak thei hrih lo a ni,” an ti bawk.
Sawrkarin dan hnuaiah wine rules mumal tak siam sela chuan grape market chu a thain kuthnathawkte pawhin an hlawkpui hle nia sawiin Hnahlan Grape Growers Society hruaitute chuan, “Tun-ah hian Nashik a training chhuak mi thiam ruaiin changkang takin kan siam a, kan thilsiam hi mipuiin an duh avangin tual chhunga zuarte pawhin duhkhawp zawrh tur an nei thei lo hial a ni,” an ti a.
Champhai Grape Growers Society secretary C.Zohmingliana pawhin, “Rules a awm miau loh avangin vendor license renew-na tur a awm lo va, license tel lovin a zuar thinte pawhin risk an la ngam lo a; chuvangin, a hralh kawngah harsatna kan tawk a ni,” a ti a. Wine rules chu awm se chuan state dang hralh dan ngaihtuah an tum niin a sawi bawk.
Kumin bik atan Hnahlan winery hian grape leina atan nuai 60 bank-ah an dah lawk a, kum 2018 atang khan grape hi winery-ah kg khat Rs.50 zela leiin grape man hi an pe nghal zel a ni.
-Zalen