State Disaster Management Authority (SDMA) chu an chairman Chief Minister Zoram-thanga hovin nimin chawhnu khan CM Conference Hall-ah thu pawimawh ngaihtuahin an ṭhukhawm.
Meeting-ah hian fur ruahtui avanga Mizoram hmun hrang hranga chhiatna thlengte thlirhovin hma lâkna kal mekte sawiho a ni a, chhiatna tawkte a tuarpui thu sawiin, Chief Minister chuan State Disaster Response Fund (SDRF) aṭanga ṭanpuina pek turte pawh a rang thei ang bera pek a nih nan hma la thuai turin a hrilh a ni.
Fur hmachhawn dan chungchanga ruahmanna neih tawh dan DC/ District Disaster Management Authority (DDMA) ṭheuha hmalak mek dante report ngaihthlak a ni a, AApda Mitra Scheme – NDMA hnuaia chhiatrupna hmachhawn leh chetlak dan chungchanga volunteer te zirtirna scheme chungchang report ni bawkin, Aizawl aṭanga volunteer 200 train chhuah an nih hnuah Lunglei, Champhai, Mamit, Kolasib leh Serchhip district-te chu telh leh a nih thu te, heng aṭang hian Mamit district aṭangin volunteer 100-te training pek an nih tawh thu ngaihthlak a ni.
Heng bakah hian SDRF inkaihhruaina thar chungchang te, Hunthar, Aizawla Landslide Risk Mitigation Scheme (LRMS) kalpui chungchang te, Covid-19 hrileng chungchangah boruak a zira inkaihhruaina ennawn a nih zel dan leh tun din hmunah hlauhthawnawm khawpa case pung a la awm loh thute ngaihthlak a ni a, African Swine Fever avanga ran vulhtu ṭhahnem takin harsatna an tawh leh hemi kawnga hmalakna kal mekte leh tihbelh ngai la awmte sawiho a ni bawk.
Meeting-ah hian Dy. Chief Minister Tawnluia, Home Minister Lalcham-liana, FCS&CA Minister K.Lalrinliana, P&E Minister R.Lalzirliana, EF&CC Minister TJ Lalnuntluanga, Chief Secretary Renu Sharma leh member dangte bakah mithiam sawm bikte an tel a ni.