Nimin khan Congress Ṭhalai (MPYCC) chuan thuchhuah siamin, ni 20.6.2022-a Congress Ṭhalaiten Chief Minister hnena damlote Health Care bill a batsak, cheng vaibelchhe 71.218 chuang (₹71,21,84,104) July ni 20,2022 hmaa release tura Ultimatum thehluta a thlen chu, Chief Minister leh Finance Minister ni bawk Zoramthanga chuan Cheng vaibelchhe 4 Mizoram State Health Care Society (MSHCS) hnenah release order a pe chhuak nghal a. Congress Ṭhalaite nawrna avanga sum pek chhuah a ni chu lawmawm an tih thu an sawi a, damlo leh an chhungte bill la turte a lawmpui takzet tih an sawi.
Hetihlai hian cheng vaibelchhe 71.218 chuang damlote bill a bat sak aṭanga bill pekchhuah loh hi, cheng vaibelchhe 67 chuang a la awm tih sawiin, July ni 20,2022 hmaa bill bat te pe vek turin Mizoram Sawrkar an phut nawn leh tih an sawi a, damlohna avanga bill tang nghak mek te mamawh anga sawrkar a chet leh chet loh an thlir zui reng tur thu an sawi bawk.