Nimin khan K.Vanlal-vena, MP (Rajya Sabha) chuan Mizoram zalenna sualtu Hnam sipaite tânna Tuirial jail hmun hlui a tlawh a, a hmun hi MP Fund aṭanga cheibawl a nih tur thu a sawi.

Tuirial Jail-ah hian Mizo Hnam sipai zalenna sualtu mi engemaw zat an tâng a, he jail pindan chhung aṭang hian lei verhin October ni 16, 1979 zanlaiah mi 18 an tlan chhuak a ni.

K.Vanlalvena chuan Hnam sipaiten lei an verhna hmunah hian thu sawiin, Mizo hnam pasalṭhate tlan chhuahna hmun hi a hlu a, ṭhangthar, zirlaite leh khualzintete tlawh theih turin a hmun hi MP Fund aṭanga cheibawl a ni dawn tih a sawi a, lei verhna lai hi danglam deuh tawh mahse, lei verh kua an hnawhna lai te pawh hai chhuah leh a ni ang a, zalenna sualtuten tha leh zung nasa tak senga an beihna hi a hlu a, ṭhangthar zawk te thinlungah ram leh hnam hmangaihna thinlung kan tuh zelna tur hmun pawimawh tak a nih a rin thu a sawi.

He hunah hian mi 18 tlanchhuak zinga tel, Lalhminga (Hmingtea) leh Lalrengliana-te pawh telin, an lei verh dan chanchin an sawi a, he leiverh aṭanga tlanchhuak mi 18 zingah hian mi 8 an la dam a ni.

Tuirial jail hlui hmun hma hi 38 Bn.BSF ten an luah mek a ni.