Mizoram State Agriculture Horticulture Forestry & Marketing Cooperative Federation Ltd. (MAHFED) chuan Aijal Club-ah General Body Meeting vawi 24-na Cooperation Minister C.Lalrinsanga hovin an hmang.
C.Lalrinsanga chuan thusawiin Cooperative Movement hi a pawimawh hle a, Cooperative Society hlawhtling tur chuan thawhhona ṭha a ṭul hle a ti a, ṭanrualna ṭha leh ṭha lo rah chu hlawhtlinna emaw tlukchhiatna emaw a thlen thei a ni a ti bawk. Cooperative Movement chu Act & Rules nei thlap a nih angin dân ang zela hnathawh leh hmalak chu duhthusam a ni tih sawiin, member kalkhawm zawng zawngte chu Act & Rules-te zirchiang turin a hrilh.
Sawrkar flagship programme hnuaiah vaimim leh bekang chu kalpui mek a ni a, vaimim MT 5000 thar chhuah beisei a nih thu te, OP12 bio-fertiliser siam leh zau zawka hman tum a nih thu te, Tualte, Lunglei leh Mizoram hmun 12 laiah Cold Storage siam tum mek a nih thute Minister chuan a tarlang a, thlai chi pawh phai aṭanga lak luh ngai lovin, Mizoram chhunga mi ngei hman a nih zel theih nan sawrkarin theihtawp a chhuak mek tih thu a sawi bawk.
MAHFED Ltd ah hian Affliated Member 115 an awm mek a, kum 2021-2022 a sum dinhmun chu ₹2,74,02,795/- a ni.