Rafael Nadal chuan French Open lalpa a nihzia pho lang nawn lehin, Pathianni zan khan straight set-a Casper Ruud hnehin French Open title 14 a la ta.
Kum 36 mi, Nadal hian Ruud hi 6-3, 6-3, 6-0-in a hneh a, Grand Slam mipa singles-a title la tam ber record a siam tawh sa chu siam belh lehin, Grand Slam title la tam ber a ni mek a, a hnuaiah hian title 20 ve ve latu, Roger Federer leh Novak Djokovic-te an awm a ni.
Nikuma semi-final-a Djokovic laka tlawm Nadal hian Paris clay-ah hian match 115 a khelh tawh aṭangin match 112-ah hnehna a chang a, kum 2010 hnua Grand Slam title a lâk zawn leh theihna hmasa ber niin, kumin January thla khan Australian Open-ah a champion tawh bawk a ni.
Kum 36 leh ni 2 a nihnaah French Open title hi a la a, heti hian French Open title la thei upa ber niin, kum 34 mi a nih laia title latu, a hnampui Spaniard Andres Gimeno record siam lai chu a khûm ta a ni.
Final-a chak zo ta lo, kum 23 mi, Ruud hi Majorca-a Nadal Academy aṭanga inzir chhuak niin, Grand Slam final a vawi khat khelhna leh professional match-a Nadal a hmachhawn hmasakna ber a ni a, world number 6-ah a kai chho dawn a, ani pawh hi Nadal ang bawka clay court hmang thiam tak niin, kum 2020 hnu khan ATP Tour-ah clay court-ah match 66 a chak tawh a, title 7 la tawhin, final ṭum 8 a lut tawh a, mahse Clay court lalpa lakah erawh a chak zo ta lo a ni.