Inrinni khan BJP Mizoram State president Vanlalhmuaka chuan Serchhip Press Club-ah thuthar lakhawmtute kawmin, Mizorama cheng Mizoten sawrkar laipuiin mipuite tana hmasawnna hrang hrang a duante a tam thei ang ber an chhawr ve a ngai tih a sawi.
Vanlalhmuaka chuan Prime Minister Narendra Modi kaihhruai NDA sawrkar chuan kum 8 chhung sawrkarna fawng a chelh tawh a, hemi chhung hian mipuite tan hna ṭha tak an thawk a, BJP Party-ten sawrkarna fawng an chelh hnuin ram mipui rethei leh khawsak harsa zawkten lei rem an rah ve theihna turin BJP sawrkar chuan ruahmanna hrang hrang a duang tih sawiin, sawrkar ruahmanna hrang hrangte a sawi a, Narendra Modi kaihhruai BJP sawrkar hnuaiah hmasawnna chak taka a kal chhoh thu te, India ram chu ei leh barah pawh a intodelh tawh thute a sawi bawk.
Vanlalhmuaka chuan India ram thingtlang khua eletric current la luh lohna khuaahte Saubhagya Scheme kaltlanga êng pek an nih thawh thu te, Mizoramah êng la luh loh khua a awm chuan amah hrilh hre vat turin chanchinbumite chu a chah a, kum 8 kalta chhung khan India ram Economy chu 8.2% zeta a ṭhan chhoh tawh thu leh, kum 2021-2022 chhungin Foreign Direct Investmemt (FDI)-ah Dollar maktaduai 83.57 zet India-in a hmuh thu a sawi bawk.
Vanlalhmuaka chuan Ayushman Bharat Card neiten inenkawlna cheng nuai 5 thleng an hmuh let theih, Mizorama kalpui ṭhat loh chu state sawrkarin a ngaih pawimawh loh vang a ni a ti a, mimala he thil hi kalpui ve tura hmalak tum an awm thu a sawi a, NHIDCL-in Mizorama kawngpui siam hna an thawhin ram a tihchhiat leh, an hna a ṭhat loh thu chu sawrkar laipuia a thuneitute hnena thlen a tum thu a sawi bawk.