Kolasib Police-ten mi rawk ching mi 4 an man leh mobile phone ruk 29 an hmuh lêt chhuina kal zelah mobile handset an ruk dang 4 hmuh belh a ni leh tawh a, hemi zinga pakhat hi Kola-sib PS-a phone rukbo thubuai ziahluha tel ngei a ni tih finfiah a ni tawh bawk.
He thubuai kaihhnawiha mobile phone rukte lo leisaktu mi 15-te pawh 411 IPC hnuaiah thubuai siamsak niin, man an ni tawh bawk a, he case hi chhuizui zel niin a dang pawh hmuh let belh zel beisei a ni.
Mi thil ruk leitu hi dan hnuaia hrem theih a ni tih hriain, thilruk ni ngeia langte chu tlawm hle mahse lei lo tur leh fimkhur turin mipuite an ngen thar leh tih Police te chuan an sawi a ni.
Kolasib Police-ten NH-306 Kolasib Tuiṭhaveng kawngpui sira dah truck pakhat aṭanga pawisa leh mobile phone rutu a puh mi palite chu kar kalta Ningani khan an man a, heng mite hi mi rawk ṭhang tak nia hriat an ni a, Police-in an mante inpuanna aṭangin heng mite hi tunhnaia Tuiṭhaveng leh Rengte Tlangsang inkar National Highway sira motor park lai aṭanga phone ruk tam takah an inhnamhnawih tih hriat niin, mobile phone an lo ruk tawh 24 hmuh let a nih bakah phone ruk ni ngeia rin, drug addict-ten phone ruk lei ṭhang hnena an lo dahkham 5 chu chhui chian tura man tel a ni bawk.
Hetihrual hian mi Mobile handset ruk lo lei chhawngtu a puh mi 15-te chu Kolasib District Court-a hruai an nih hnuin Kolasib District Jail ah dahluh an ni.