Zothlifim Logo
Loading ...

Governor Hari Babu Kambhampati chuan Mizorama zirlaite chu lehkha thiam thei tak leh hmun danga zirlaite el phaka thluak ṭha an ni a, a zirna kawng a inhawn phawt chuan vansang lam thil pawh hlawhtling takin an zir thei turah a ngai tih a sawi.

Nimina a chenna hmuna kâwmtu Indian Technology Congress Association ( ITCA), Bangalore-a a khaipate zinga mi Dr. SK Prasad hnenah he thu hi sawiin, Governor chuan, Dr. SK Prasad leh a thawhna hmuna thuneituten Mizo-rama zirlaite tan vansang lam zir theihna hun remchang an rawn zawnsak chu a lawmawm hle a ni, a ti a, hemi kawngah hian ITCA hotute chuan H&TE Department, Mizoram University, NIT Mizoram, Polytechnics, Science & Technology Department leh Science Teachers Association of Mizoram-te berâwn se, zirlai thiam thei zual zinga space technology zir duhte thlan chhuah a awlsam a rin thu a sawi a ni.

Dr. SK Prasad chuan Prime Minister hmathlir angin India ṭhalaite chu vansang lam zirnaah thiamna sâng zawk nei tur leh India ram chu a hmahruaitu a nih theih nan chher hriam mek an ni, a ti a, he hmalakna kal zelah hian zirlai team 75-te chu kumina project 75 thawk zo hman turin Students’ Satellites 75 project hnuaiah satellite tê chi siam turin thlan an ni dawn, a ti a, he project-ah hian India rama zirlaite zawng zawng an inel dawn a, hetah hian Mizorama zirlaite tan pawh tel theihna hun a inhawng thei dawn niin a sawi.

Dr. Prasad-a chuan a lo kal chhan tak chu Higher Secondary aṭanga University Degree zirlaite tan Space Technology zirna an kalpui mek chu Mizorama zirlaite rawn hmelhriattir a ni, a ti a, hemi kawngah hian Governor leh state sawrkar hotute thlawpna a rawn ngenin thawh-puiah a rawn sawm a ni.