Zothlifim Logo
Loading ...

Nimin khan Serchhip Auditorium-ah Govt Higher Secondary School Serchhip chuan zirlai tiṭha chawimawina hun leh zirlai lut tharte lawmna hun (Felicitation & Freshers’ Social programme) hun hman a ni a, he hun hi Bialtu MLA Lalduhoma chuan khuallian nia hmanpuiin, Mizorama zirna kalphung chu siam ṭhat a ngai tawh tih a sawi.

Lalduhoma chuan “Hri leng avanga hun hrehawm tak kan paltlang chung pawha Govt. Higher Secondary School Serchhipin HSSLC result ṭha tak kan nei thei hi lawmawm ka ti hle a; hetiang result ṭha kan neih theihna chhan chu Principal leh zirtirtute inpekna avang te, zirlaite thawh rim vang te a ni a, ka chhuang tak zet che u a ni,” tiin zirlaite leh zirtirtu chuan chawimawi an phu thu a sawi a ni.

Bialtu MLA chuan, “Sawrkar School-in result an nei ṭha lo telh telh a, Private school leh Kohhran enkawl school te’n result an nei ṭha tulh tulh thung a; hei hi a chhan ngun taka kan ngaih-tuah a ngai a ni,” a ti a, sawr-kar pawhin private school-te chu nasa zawka ngaihtuah-in, an pualin budget pawh tam zawk dah ni thei se, chutiang a nih chuan, sikul ṭha zawk ni tlangpui private sikulte chu mipui nawlpui ban phak a ni thei ang tih a rin thu te, ngun taka ngaihtuahna sen a ngaih thu a sawi a, sawrkar school ṭhatna Delhi-a zirna kalpui dante pawh uluk taka an zir chian mek thu a sawi bawk.

Zirlaite fuihna thu sawiin, HSSLC pass tate chu an kal leh zelna turah Pathian, nu leh pate râwn chunga uluk taka thutlukna siam turin a chah a, zirlaite leh ṭhangtharte chu, rinawmna leh thu awihna nen ram siam ṭha tura pen chhuaka eirukna do turin a sawm bawk a ni.

Samuel Saiṭhuamliana, Lecturer kaihhruaia he hun hmannaah hian RK Sanghmingliana, Principal chuan inlawmna thu leh School chanchin tlangpui a sawi a, zirlai tiṭhate hnenah lawmpuina thilpek hlan niin, zirlai tiṭha chawimawite hnen aṭang leh sawm bikte hnen aṭanga thusawi tawi ngaihthlak niin, chawhnu lamah Variety Programme hman zui a ni.

Kumin Pawl 12 Board Exam-ah khan Govt HSS Serchhip hi Mizorama sawrkar HSS zingah a tiṭha ber an ni a, Arts Subject-ah zirlai 100 exam aṭangin za-a 95 pass-in, Distinction-ah 1, 1st Division-ah 15, 2nd Division-ah 43 leh 3rd Division-ah 36 an pass a, Compartment 1 a awm bawk. Science Subject-ah zirlai 30 exam aṭangin za-a 93 an passed a, Distinction-ah 1, 1st Division-ah 11, 2nd Division-ah 15 leh 3rd Division-ah 1 passed a, Covid -19 hrileng avanga Exam theilo mi pahnih awmin, tun thla ni 22 khian exam an hma-chawn leh dawn bawk a ni.


Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117