Mizoram sawrkar hnuaia hnathawk inzawm-khawm pawl lian ber, Federation of Mizoram Government Employees & Workers (FMGE&W) chuan Dearness Allowance (DA) tipung tura sawrkar nawr nan June ni 27 – July ni 1, 2022 chhungin badge dum bel nise an ti a, awmzia a neih loh chuan hmalak chhunzawm zel tur dan tur rel leh nise an ti.
Nimina FMGE&W Executive Committee ṭhu-khawm chuan thil man to zel phuhruk nan a D.A. pung ṭhin chu tunah hian central sawrkar hnathawkte chuan 34% an lak tawh laiin Mizoram sawrkar hnathawk-te chuan 28% an la mek tih sawiin, central sawrkar hnuaia hnathawkte anga an lak ve nan sawrkarah vawi engemaw zat an dilna chuan awmzia a neih rih loh avangin sawrkar kar nan ni 27 June aṭanga ni 1 July 2022 thleng badge dum bel nise tiin a rel a, hei hian awmzia a neih loh chuan hma lak chhunzawm zel tur dan tur rel leh nise an ti a, OB meeting-in a lo rel tawh angin hemi chungchang sawipui tura Chief Minister hmuh leh tumin nimin khan CM hmuh dilna an thehlut leh bawk a ni.
Hei bakah hian sawrkar hnathawkte kumtinin thi leh pension mi 2000 chuang an chhuak zel a, hetihlai hian heng mite aia thawk tur hna thar lak kum 10 chhung a awm ṭhat fumfe rih si loh avangin hnathawktute leh hna thawhin nasa takin a tuar zel tih an sawi a, hetiang zela an kal chuan sawrkar leh a hnathawhin a tuarin hma-sawnna hna thawktute indaih lohna nasa zelin, hna thawh chak loh phah theih a ni a, hemi indaih lohna phuhruk nan hian General Conference 2021-a neihin a lo rel tawh angin pension kum 60 hman mek chu kum 62-a tihsansak turin sawrkar an ngen nghal bawk a ni.