Mizoram Youth Commisson (MYC) Chairman Dr. Vanlalṭanpuia, MLA chuan MINECO-a MYC Conference Hall-ah thuthar lakhawmtute a kawm a, MYC puihnaa zirlai thiam bik thlan chhuah UPSC exam hmachhawn tura buatsaihna tur Super IAS 40 programme ruahman a nih leh thu a sawi.
Dr. Vanlalṭanpuia chuan kum 2021 chhunga Super IAS 20 programme kalpui chu crash course chauha kalpui a nih thu leh COVID-19 hrilengin heta zirlai thlan chhuah Delhi-a coaching kaltir te a tihbuai thu te, thla 6 chhung coaching an kal tur pawh thla 3 chauh an kal hman thu a sawi a. Kum 2021 UPSC preliminary exam-ah pawh vanduaithlak takin an paltlang zo lo a, kum 2022 exam-ah khan exam an hmachhawn leh vek a, hetah hian an tling zo lo a nih pawhin test series te nena umzui zelin nakum kum 2023 exam an hmachhawn leh vek tur thu a sawi a ni.
Kumina Super IAS 40 programme chu crash course ang chauha kalpui tawh loin foundation course kum 1 chhung kalpui turin MYC in ruahmanna a siam tih MYC Chairman chuan a sawi a, hemi atana inziaklut chu Aizawl centre-ah mi 397, Lunglei centre-ah mi 88, Siaha centre-ah mi 38, Kolasib centre ah mi 27 leh Mizoram pawnah Delhi centre-ah Delhi Mizoram House-a official te buaipuiin Vision IAS Academy-ah mi 25 an exam dawn thu a sawi bawk a ni.
Heta thlan chhuahte hi bond ziah tir vek an ni ang a, UPSC preliminary exam vawi hnih tal an hmachhawn hma chu exam dang reng reng an hmachhawn thei dawn lo tih MYC Chairman chuan a sawi a. All India Service Mizoramin a neih theihna tura an hmalakna ṭawiawm turin mipuite a sawm a, rang taka heng hmalakna te avanga tlin vut vut theih a nih loh avangin engtikah emaw chuan an hmalakna chu a hlawhtlin a, Mizo thalaite zinga IAS ngei pawh an nawm thuai a beisei thu a sawi a ni.