Zothlifim Logo
Loading ...

NABARD sum hmanga sak, Bilkhawthlir Primary Health Centre chu nimin khan Health Minister Dr. R. Lalthangliana’n a hawng.

Minister chuan Primary Health Centre, Bilkhawthlir hawn theiha buatsaih a ni chu lawmawm a tih thu sawiin, PHC sak puitlin nana thawktu inpe zo tak tak an awm chu an fakawm, a ti a. Serlui biala Health Sub-Centre awm zawng zawngte chu Health & Wellness Centre-ah hlan kai vek tawh a nih thu sawiin, Vairengte Community Health Centre pawh tihchangtlun chhoh zel tum a ni, a ti.

Lalrinsanga Ralte, MLA, Vice Chairman, Rubber & Allied Crop Development Board pawhin thu sawiin Serlui Assembly Bial chhunga Health Clinic hawn tharahte mipui hriselna endik hna chak zawk a kalpui a nih theih nan MLA fund hmangin mi 7 chhawr mek an ni, a ti.

Health Services Joint Director Dr.Vanlalsawma tarlan danin Bilkhawthlir Primary Health Centre chu NABARD RIDF XXV hnuaia sum, ₹2,25,58,000/- hmanga sak a ni a, Zozam Engineering Construction & Consultancy-in ni 9, September, 2020 khan sa ṭanin ni 23, November, 2021 khan sak zawh a ni a, thla thar July hian hman ṭan theih tura beisei a ni.


Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117