Skip to content
Home » Chanchinthar » District Hospital a hmun ngaia sak thuai a nih theih nana PIL file turin JAC-te an inpeih têp

District Hospital a hmun ngaia sak thuai a nih theih nana PIL file turin JAC-te an inpeih têp

Joint Action Committee on Serchhip District Hospital Site hruaitute chuan Serchhip District Hospital building thar chu a hmun ngaia sak thuai a nih theih nana Gauhati High Court-ah PIL file an tum tih sawiin, PIL file tur hian an inpeihfel ṭep tawh tih an sawi.

Nimin khan JAC on Serchhip District Hospital site hruaitute chuan Ser-chhip Press Club-ah thuthar lakhawmtute kâwmin he thu hi an sawi a, an chairman Kapliana Pachuau chuan Serchhip District Hospital Building thar Power Grid Corporation of India Ltd. CSR Fund cheng vbc. 21 crore hmanga sak a ni tur chu an lawm hle tih sawiin, he sum hi a hmun ngaia Hospital Building thar sakna tura Detailed Project Report (DPR) siam, dilchhuah leh pek a nih ang ngeia sak thuai hi an phut tlat tih a sawi.

Serchhip District Hospital thar sakna atana NGO Co-ordination Committee-in an rawtna, Bukpui rama sak a nih tur thu Chief Minister Zoramthanga’n July ni 25, 2022-a Serchhip Auditorium-a a puan hnuah JAC hruaituten VC, YMA, MHIP leh MUP Branch hrang hrangah ngaihdan an la ta a, tih a sawi a, hetah hian VC 8, YMA Branch 7, MHIP Branch 10 leh MUP Branch 10-in a hmun ngaia sak an duh thu an sign-sak tih a sawi a, zawhna chhângin JAC Chairman chuan Signature Campaign chu New Serchhip leh Chhiahtlang lamah chuan mipuiten a hmun ngaia sak an thlawp lo nia an hriat avanga an kalpui ve loh thu a sawi.

Hemi hnu hian Chief Minister chu a Office-ah hmuin, a hmun ngaia Hospital Building thar sak duh Serchhip mipuiah an tam zawkzia Seal leh Signature hmanga VC, YMA, MHIP leh MUP Branch hrang hrangten an tarlanna leh ni khat thil thua Serchhip Bazara Signature an lakkhawmte an hlan tih a sawi a, CM pawhin Health Minister Dr.R.Lalthangliana chu thil awmzia lo hrilh a, Health Deptt. thuneitute Serchhipah tirhchhoh a, Hospital ṭhiah chhunga lo luah lailawk tur lo enpui turin JAC hruaitute hi a lo ngen tih an sawi a, Chief Minister duhdan anga Health Minister pawh hma la thuai tura an phut thu a sawi bawk a, tunah chuan a sakna hmun tihchian chu Health Minister kuta a awm ber tawh nia an hriat thu a sawi bawk.

Serchhip District Hospital Bukpui rama sak a nih theihna atan Tuikum Bialtu MLA Er.Lalrinawma chuan nasa taka hma lain CM leh Health Minister te, Health Deptt. Official te thlengin na takin a kar nia an hriat thu a sawi a, Serchhip District Hospital chu Serchhip Constituency aṭanga engti kawng zawng maha Tuikum Constituency-a sawn chhuah an phal loh tur thu a sawi a, NGOCC hruaitute pawh an member-te an nghing tawh tih an hriat avangin an che ṭha vak duh tawh lo nia an hriat thu a sawi a, Tuikum bialtu MLA chu hma latu awmchhun ni deuh ber tawha an hriat thu a sawi bawk.

DC kaihhruaina hnuaia JAC leh NGOCC-te inhmuhkhawm ṭuma sawrkarin hospital sakna tur bak mamawh dang sum a tum thei dawn a nih chuan Bukpui rama sak an remtih thu an sawi tawh hnua CM-in cheng vbc. 13 a thehchhuak chunga a hmun ngaia sa tura an nawr lehna chhan zawhna chhangin, CM-in cheng vbc. 13 pek a tiam tawh chu RTI hmanga an dilnaah a sum pek tur a lo la thleng lo tih an hriat thu sawiin, hemi hnu hian JAC executive chu ṭhukhawm lehin, engtikawng zawng maha damdawi in sawn chhuah chu rem an tih loh thu thutlukna an siam leh ta zawk tih a sawi bawk.

Thuthar lakhawmtute kawmnaah hian an chairman bakah an Secretary Lalbiakdika leh Executive Member Lalnunsiama Pachuau-te an tel a ni.

Leave a Reply

This site uses Akismet to reduce spam. Learn how your comment data is processed.