Zothlifim Logo
Loading ...

Deputy Speaker, Er. Lalrinawma, Tuikum bialtu MLA ni bawk chuan nimin khan a bial chhung Sialhau khua tlawhin, Buanhmun Handloom Cluster hnuaia puantaha eizawn tumte inkawmhona hun a hmanpui.

Er.Lalrinawma chuan a bial chhung tana MLA Fund a hmuh zaa 80 vel zet chu eizawnna lam hawi atan a hman thu a sawi a, thil dang a ngai pawimawh lo a nih loh thu sawiin, eizawnna chu a ngaih pawimawh zual bik vang a nih thu a sawi.

Kan bial chhung khaw hrang hrangte dinhmun thlir kual chungin theihtawpin an ûmzui ṭhin tih a sawi a, khaw hrang hrangte mamawh a inang vek lo a, Sialhau khaw tan chuan puantaha eizawnna chu a ṭha ber dawn nia a hriat avangin hma an la ta tih a sawi.

Buanhmun Handloom Cluster hnuaiah hian chhungkaw 31 velin bul an ṭan dawn a, eizawnna ṭha taka a chan zui zel theih nan anmahniah thil thui tak a innghat chho dawn tih a sawi a, Sialhau khua chu Zoramin puantah an hriatzui ngei a beisei tur thu a sawi bawk.

Bialtu MLA hmalakna hian Sialhau khuaah hian puan bânna leh a thilna hmun tur in, RCC building ṭha tak sak a ni tawh a ni.