Aizawl – Thenzawl – Lunglei (ATL) Road Sekhum aṭanga Pukpui chhe lutuk avanga lungawih lohna lantir nan YMA Sub-Hqrs Lunglei huaihawtin nimin khan Lunglei District-ah lirthei tlan chhuah loh runpui, No Vehicle Day hman a ni.
Nimin zing dar 6 aṭanga tlai lam dar 5 thleng No Vehicle Day hman hi District khawpui Lungleiah chuan mipuite’n an zawm ṭha hle a, an phalsak bak lirthei dang khawlaia chhuak hmuh tur an awm lo a, khawpui chhung pawh nidang zawng aiin a reh a, thil ṭul pawimawh tia khawlai mihring kea kal hmuh tur erawh ṭhahnem tak an awm a, sawrkar Pisa leh Zirna In te chawlh puan nilo mahse Sawrkar Pisa a thawk mi tam tak chuan lirtheia kal theih a nih loh avanga harsatna tawkin Pisa kailo ṭhahnem tak an awm bakah sikul naupang sikul kal theilo pawh ṭhahnem tak an awm a ni.
YMA Sub-Hqrs. Lunglei hruaituten tun hnaia thuthar thehdarhtute an kawmna ah, ATL kawng a chhiat em avangin chhim lam mipui an buai hle tih an sawi.