Mizo Academy of Letters (MAL) chuan kum 2022 chhunga Mizo ṭawng Lehkhabu chhuak ṭha ber atan Dr. Zohmangaihi ziak ‘Daidanna Bang Phena Thuruk’ chu a thlang a, nimin khan ‘Book of the Year, 2022’ chawimawina hi a dawngtu hnênah MAL chuan a hlan.
MAL din champha puala inkhawm, Central YMA Hall-a buatsaihah hian khuallian R.Lalzirliana, Art & Culture Minister chuan BoY dawngtu hnênah hian chawimawina thuchei (citation) leh pawisa fai ₹10,000/- chu Dr. Zohmangaihi hnênah hian a hlan a ni.
MAL President, Prof. RL Thanmawia kaihhruai he inkhawmah hian, Book of the Year thlangtu Committee Secretary, Dr. C.Lalawmpuia Vanchiau-in a tarlandan chuan, kum 2022 chhung khan lehkhabu 203 a chhuak a, hêng zîngah hian hmun hmuha ṭhena hmun khat aia tam chu Christian Literature a ni a, kehkhabu khâwn khawm zîngah hian bu 5 hi Myanmar rama chhut leh chhuah a ni a, Tripura lam chhuak 2 a awm bawk. Hêng lehkhabu aṭang hian lehkhabu 36 ah insawrbing a ni a, chuta ṭang chuan top 20 thlan a ni a, chumi hnuah top 10 thlan leh niin chuta ṭang chuan Top 3 thlan leh a ni a, tichuan a tawpah Dr. Zohmangaihi ziak, ‘Daidan-na Bang Phena Thuruk’ tih chu a thlang ta a ni.
MAL din champha leh Book of the Year lâwmman hlan inkhawmah hian MAL member ziak lehkhabu 4 chu khuallian R.Lalzirliana hian a tlângzarh a, Mizo ṭawng humhalh leh tihhma-sawn chu hnam tana thil pawi-mawh tak a ni a ti.