Nimin khan Mizoram University leh Amrita University (Amrita Vishwa Vidyapeetham), Kerala ṭangkawp buatsaihin, MZU Education Department Seminar Hall-ah NGO leh khawtlang hruaitute nena Zirna leh Zirna atana Digital hmasawnna chungchang sawihona – ‘Civil 20 (C20) Mizoram Conclave on Education & Digital Transformation’, neih a ni a, he conclave hi Governor Dr Hari Babu Kambhampati chuan khuallian niin a hmanpui a, he hunah hian Governor chuan Amrita University leh MZU ṭangkawpin Science and Technology Innovation Hub (STI Hub) an din hmanga Tribal mite zirna, eizawnna leh khawsak phung tihhmasawn tuma hma lak an tumna program a hawng nghal bawk a ni.
MZU-in an thawhpui Amrita University hi India rama University ṭha zual NIRF Ranking 2022-ah university ṭha ber 5-na a ni mek a, MZU leh Amrita University thawhhona hnuaiah hian Science, Technology leh Innovation (STI) hub Aizawl leh Serchhipah siam a ni dawn a ni.
Governor chuan mithiamte leh con-clave chhim tura sawm bik tlawmngai pawl leh khawtlang hruaitute chuan an thupui pawimawh tak tak 3 an sawihona aṭangin hmalak dan tur ṭha zawk an hmuh chhuah a beisei tih a sawi a, India ram chu digital technology-ah hma a sawn nasa tawh hle a. tunah hian 5G technology kan hmang tawh a, kum 2030 a lo thlen chuan 6G hman kan tum a ni a ti a, zirna huanga tunlai thiamna hman ṭangkai a pawimawh zia sawiin hei hi Mizo-ram pawhin kan ṭanlakna tur a ni a ti.
Governor chuan Mizoramah eizawnna atan mi tam zawkin tlangram lo neih kan hmang a, hei hi tunlai khawvel sik leh sa inthlak danglam nasa takah hian a hlawk loh mai bakah a him lo chho telh telh a, thiam bik thil eng enge maw neih kan tum a ngai a, kan ṭhalaiten an theihna sang tak hmang ṭangkaiin chhawr tlaka thiam thil an zirchhuah tam a pawimawh telh telh dawn a, hetiang zawng hian kan eizawnna him tawh lo aṭangin a hlawk zawk leh him zawkah insawn kan tum tur a ni a ti.
Prof. Pravakar Rath, Vice Chancellor, MZU-in conclave palai te lawmna thu sawiin, Dr Renu Sharma, Chief Secretary chuan conclave chungchang sawi hawnna hun hmangin, Mizoram-ah Digital infrastructure tan Budget-ah sum dah tam kan mamawh tih a sawi a, tunah hian India ramah ziak leh chhiar thiam tam lama tehin a sâng ber pahnihna kan ni mek a, hei hian digital technology lamah pawh ṭan kan lak chuan state hmasawn ber pawl kan ni thei tih a tarlang tih a sawi.
Conclave-ah hian Ambassador Vijay K Nambiar, Principal Coordinator, C20 te, Hasina Kharbhih, Founder & Chairperson, Impulse NGO Network & Impulse Social Enterprises, Shillong te, Lalhmachhuana, Vice President, CYMA leh Prof Prema Nedungadi, National Coordinator, working Group on C20-te pawhin thu an sawi bawk a, sawihona hun ṭhen 3-ah neih a ni a – Substance Abuse Awareness, Skill Development and Digital Transformation, leh Food, Nutrition and Ayurveda-te chu thupui atana hman an ni.