Hriangtlang Health sub-centre building thar sak danah a sak dan tur ang tling lo zela sak a nia sawiin, Hriangtlang mipuiten an lungawi loh thu an sawi nasa hle a, nimin khan Chief Medical Officer’s Office, Serchhip aṭangin Sub-Centre building en hian thawktute an kal.
CMO Office aṭanga kalte hi Senior Medical Officer (SMO) chuan a ho a, Sub-Centre sak dan tur drawing anga sak ni loa sawi laite enfiahin, a thlate an la a, an thil hmuhdan report-te hi CMO-te nen thlirho-in an muh dan chu hotu sang zawkte hnena thlehluh an tum thu CMO chuan a sawi.
Tarlan tawh angin Hriangtlang Sub-Centre sak mekah hian contractor hian sak dan tura ruahmanna awm sa (estimate) tling lovin thil tam tak a siam niin Hriangtlang JAC-te chuan an sawi a, contractor-in a sak dan tur tling lova thil tam tak a sak aiah hian a drawing-a tel lo, a panna kawng siam leh a kawt dawlzawl hnate thawhsak mai tura inremna an neih tawh chu thawk lovin contractor lamte hi a rukin an haw niin an sawi a, hei vang hian tunah hian Hriangtlang mipuite chu an lungawi lo hle a, hmalak zui zel dan tur an la ngaihtuah mek a ni.