Nimin, Pathianni hmang khan Presbyterian Kohhran Pastor bial hrang hrangte chuan Bial Inkhawmpui an hmang a, nizan khan inkhawmpui hi a ṭiak a ni.
Inrinni khan rorelna hun hman niin, Serchhip Pastor Bial Inkhawmpui vawi 89 Serchhip Bethel Kohhran Biak in, P&E Vengah neih chuan Chanchinṭha thlen ni March ni 15-a hman tura tih chuan harsatna nasa tak a thlen avangin a hun ngai Jan ni 11-ah hman leh ni rawh se tiin an pass a, New Serchhip Kohhran Biak ina New Serchhip bial inkhawm-pui rorel chuan ramngaw, nungcha leh tui hna humhalh kawngah Synod-in chak zawkin hma la rawh se, tih leh, MLA inthlanpui neih tura bial huapa ṭawngṭai rualna hun hman rawtnate pass a ni a, Serchhip Veng-chung pastor bial inkhawm-pui Serchhip Chhim Veng Kohhran Biak ina neihah ruihhlo ngai chhanchhuah kawngah kohhranin hma lak dan kawng zawng rawh se tihte an pass a, Bial Inkhawmpuia thu pass-te hi Presbytery Inkhawmpuia chhawp chhuah leh a ni dawn a ni.
Presbyterian kohhran Pastor bial inkhawmpui hi Zirtawpni aṭang khan committee hrang hranga bul ṭan a lo ni tawh a, Inrinni zan aṭangin thlarau lam thupui ngaihthlain nimin chawhnu-ah Lalpa Zanriah Sakramen kilho a ni a, nizan lamah chairman kal chhuakte hnen aṭangin thuchah ngaihthlak a ni.