Hriangtlang Joint Action Committee chuan an khuaa Health Sub-Centre sak chu sak dan tura ruahmanna awm anga sak a nih loh avanga an lungawi loh thu sawiin, hemi chungchang hi Health Minister hnena thlen an tum thu an sawi.
Zothlifim-in hemi chungchanga Hriangtlang JAC hruaitute a biaknaah an khuaa Sub-Centre an sak dawn hian Contractor leh Department lama a drawing an dil chu an pe thei lo a, contractor-in a ban a phun hnuah Department lamin drawing kimchang vak lo an pe chhuak a, hemi drawing an neih mila Sub-Centre sak hna an thawh dan an endiknaah a ban an phunnaa a foundation siam a dik lo tih leh, a ban atana ring rod an hman pawh a tling lo tih an hmu nghal tih an sawi a, mahse hna engemawchen an lo thawh tawh avangin inṭhiahtir leh chu tihchi-ah an ngaih bik loh avangin an hnathawh leh zel turah chuan a nihna anga sa chhunzawm tawh turin an hrilh tih an sawi a, hemi hnu hian Sub-Centre sak hna chu chhunzawm zel a ni a, JAC lamin a drawing an neih chin bak an sak hnuah a nih tur anga sak a ni lo tih hriat leh zel a ni tih sawiin, a liang 14ft-a sang tur chu 8ft vel chauhin an lo siam tih te, septick tank khur pawh a nihna tur aia zim leh a chhunga pindan awm lova an siam thu te, pindan pahniha floor tile phah tura tih chu pakhat chauha phah a nih thute an sawi a, hei vang hian mipui lam chuan chhut chhiat an rawt a, mipui pawh hmanruate nen an pungkhawm hman tih a sawi a, amaherawhchu contractor lamte an indawr-naah, a sak dan tur ang tling loa an sak avangin drawing-a tel lo, a panna kawng leh a kawt zawlte chu siamsak mai turin inremna an nei tih a sawi a, a hnathawh dan dik loh vang hian hun engemawchen chu CMO lam pawhin stay order pe-in hna pawh an chawl lailawk tih a sawi a, amaherawhchu a sak dan tur ruahman ang tling lova hna a thawh avanga drawing-a awm lo hna dang thawh tura khawtlang nena inremna an neih chu thawk lovin a rukin an haw ta daih tih sawiin, mipui an lungawi lo hle tih a sawi a, hemi chungchangah hian Thawh-lehni khian Health Minister hmuh an tum tih a sawi a, Sub-Centre sakna estimated amount hi cheng nuai 19 niin, contractor hian bill a lak kim tawh leh tawh loh an hriatpui loh thu a sawi bawk.