Chakma Autonomous District Council (CADC) inthlanpui vote thlak mekah nimin chhun thleng khan vote zaa 93.76 a tla a ni.
Polling Station 70 awmna CADC-ah hian BJP Candidate a thih vanga inthlanna neih theih lohna tur bial Rengkashya biala Polling Station pathum tel lovin, bial 19-a Polling Station 67-ah mipuiten zing dar 7 aṭanga tlai dar 5 inkar khan vote an thlâk a, hmun ṭhenkhatah chuan vote thlak hun hi pawhsei a ni a, Vote tla te hi ni 11 khian chhiar a ni dawn a, Rengkashya bial ah hian tunthla ni 17-ah vote thlak a ni thung dawn a ni.
Tarlan tawh ṭhin angin, CADC inthlannaah hian Bial 20 hi BJP, Congress leh MNF chuan an chuh kim vek a, ZPM erawh chuan bial 13 an chuh a, CADC bial 20 inthlanna chuh tur hian candidate 73 an awm a ni. Bial 13 hi kil 4 a inchuh a ni a, bial 7 chu kil 3 a inchuh a ni ang.
Nimina vote thlak lai hian boruak duhawm lo thleng khawi aṭang maha hriat tur a awm lo a ni.