Nimin khan Mizo Zirlai Pawl (MZP) Hqrs. Champhai buatsaihin Govt.Gandhi Memorial Higher Secondary School tual leh a kiang hnaiah zirlaiten Govt.GM Higher Secondary School a zirtirtu indaih loh avanga an lungawilohna lantir nan Sit-in demonstration an huaihawt.


Govt. G.M. Higher Secondary School-a zirtirtu indaih lohna chungchang hi Mizo Zirlai Pawl Hqrs. Champhaiin kum 2019 aṭangin a buaipui tawh a, tun thlenga thu lawmawm hriat tur a awm tak loh avangin nimin khan lungawi lohna an lantir a, hetihlai hian sawrkarin an thil ngiatte a tihhlawhtlin loh avang leh sawrkar aṭanga an lungawina tawk chhanna an hmuh loh avangin vawiinah sawrkar laka an lungawi lohna lantir chhunzawmna turin Champhai khawpuia sawrkar office zawng zawng leh zirna In zawng khar vek tura hmalak nise an ti a, hei hian Bank leh Hospital OPD a huam lovang an ti.
Thuchhuah an siamah MZP Hqrs.Champhai chuan Govt GM Higher Secondary School hi Champhaiin sawrkar enkawl Government Higher Secondary School a neih chhun a ni a, Champhai khua leh a chhehvela mite pan ber a ni a, zirtirtu an indaih loh avang hian zirlai harsa tak takten sum tam tak sengin hmun dangah zirna chhunzawm a ngai ṭhin a ni an ti a, English, Mizo, Accountancy leh Biology-te hi zirtirtu indaihlohna zualpui a ni an ti bawk.