Union Minister of Ports, Shipping and Waterways Sarbananda Sonowal leh Myanmar Deputy Prime Minister leh Union Minister for Transport and Communication Admiral Tin Aung San-te chuan nimin khan Myanmar ramchhung Rakhine state-a lawng chawlhhmun Sittwe Port an hawng.
Port thar hawnnaah hian Kolkata-a Syama Prasad Mookerjee Port aṭanga rawn vailiam bungraw phur lawnglian chi chu lo dawnsawn a ni a, nimina Sittewe Port hawn tak chuan ram pahnih leh an chhehvel sumdawnna bakah Rakhine state eibar dinhmun nasa takin a tihmasawn dawn a, inkalpawhna ṭha zawk hian hna thar tam tak a siam bakah hmasawnna tam tak a keng tel a ni.
Union Minister Sarbanda Sonowal chuan thusawiin, India leh Myanmar-ten tun hma aṭanga inkungkaihna leh insumdawntawnna an lo kalpui tawh dante a sawi a, Myanmar mipuite hmasawnna leh hausakna turin Idnai chuan hun rei tak ata tawh theihtawp a chhuah a, tuna Sittwe port hawn tak hi a thawhrah pakhat a ni a ti a. Sawrkar laipui suma hmalakna Kaladan Multi Modal Transit Transport Project peng pakhatah he port hi telh a ni a ti a. KMTTP hi tihpuitlin a nih hunah chuan India ram chhak lam tuipui kam vel leh hmarchhak state-te chu Sittwe port hmang hian awlsam taka kalpawh theih a ni tawh ang a ti bawk.