MNF Party chuan thuchhuah siamin, Chief Minister Lalduhoma’n Easter Sunday khan Aizawl North Treasury leh South Treasury-te tlawhin an hnathawhte a enfiah tih tarlangin, ‘Chief Minister hi Adviser to CM (Finance) TBC Lalvenchhunga leh official lian thahnem takin an tawiawm tih sawiin, Chief Minister Pathianni zah lo kan nei tiin an sawi.
MNF chuan Mizoram Chief Minister, kohhran upa lehnghalin Pathianni, Pathianniah pawh Kristiante ni pawimawh bik Easter Sunday bawhchhia a, sawrkar office tlawha an hnathawh a enfiah chu Mizorama thil la thleng ngai lo nia tarlangin, ‘Pathian ni ni lo, office enfiah leh tlawh hun tur a tam tehlul nen Pathianni kher office tlawh nana Mizo CM-in a hmang duh hi MNF chuan mak kan ti,’ tiin, Mizoram CM-in kristianna a lak thutak lohzia leh a lâk lapzia a lang chiang hle niin an tarlang.
MNF chuan CM Pathianni zah loh kan nei nia tarlangin, ‘Inthlanpui leh thil pawimawh dang Pathiannia ruat a nih thin dodala Mizo Kristiante kan lo tanrual tawh thin laia, kan CM berin Pathianni zah lo taka chêt a la ta mai hi MNF chuan pawi kan ti hle. Hun kal zel turah Pathianniah thil pawimawh India sawrkarin Pathiannia a rawn ruat leh a nih chuan kan CM hian mawh thûk takin a phur dawn a ni. Kan CM hian Kristian CM a nih hi hrerengin tun hnuah chuan Pathianni zah tawh turin MNF chuan Pu Lalduhoma hi a chah a ni,’ an ti.