PC Party chuan thuchhuah siamin, an symbol hamrik hmantir loa Returning Officer-in electric bulb a hmantir leh tak avangin Election Commission of India (ECI)-ah lehkha an thawn thu an tarlang.
PC Party chuan ECI-ah ni 5.3.2024 khan symbol atan electric bulb an dil thu tarlangin, ‘Chhânna kan hmuh lâwk loh avangin phalsak kan ni dawn nge dawn lo tih kan hriat loh avangin free symbol-a mi hamrik chu kan thlang ta a ni. Ni 18.3.2024-a candidate puanna Kolasib Press Club-a kan neihah pawh kan puangzar nghal a ni. Kan symbol chu hamrik tiin campaign kan tan nghal,’ an ti.
PC Party tarlan danin, ni 26.3.2024-ah nomination an file a, an symbol-ah hamrik an thlang tih an tilang a. Nomination an file zawh hnuah ni 28.3.2024-ah scrutiny neihfel a ni ta a, symbol-ah hamrik tihngheh a ni a, hemi ni vek hian ECI-a an dil angin symbol atan electric bulb hman phalsakna lehkha chu Joint Chief Electoral Officer James Lalnun-mawia hnen atangin an dawng ta chauh a ni an ti.
Ni 30.3.2024 (Inrinni)-ah plan of printing of postal ballot tura party candidate-te koh an ni a, hetah hian an candidate Rita Malsawmi chu Seventh Day a nih avangin a tel thei lo a, a agent VL Thazoa chu aikalah a hmang a. Hemi ni hian Returning Officer Nazuk Kumar Aizawl DC chuan candidate-te hming leh an symbol-te a tarchhuah vek hnuah ECI lehkha avang chuan hamrik chu electric bulb-in a thlak leh ta a ni.
PC Party chuan campaign an neih vek tawh hnuah ECI-in electric bulb hmang ngei rawh se tia thu chhuah a awm lo chungin ECI lehkha anga kalpui tlang a nih thu tarlangin, hei hi an pawm thei lo tih sawiin, ECI chuan an thil tih chu ennawn leh se, an ti a, hamrik hi 2024 MP election symbol atan hmantir leh ngei se an duh thu nimin khan an thlen a ni.