Rafael Nadal chuan Monte Carlo Masters khel thei lovin a inhnuhdawh thu a puang a, kumin French Open a khel thei ang em tih a chiang ta lo a, hetihlai hian Novak Djokovic chuan a tawp nan tal Nadal nena French Open-a inkhelh a chak thu a sawi.

Kum 37 mi Nadal hi Grand Slam vawi 22 a champion tawh a, Djokovic hi vawi 24 a champion tawh thung. Nadal hian Grand Slam 10 vel lai khel lovin a chawlhsan tawh a, kumin kum tawpah tennis chawlhsan a tum bawk.

Hetih lai hian Djokovic chuan Nadal hian a chawlh hmain fit tak chungin tournament pakhat tal khel leh hram se a tih thu a sawi a, “Clay court-a a turuzia kan hre vek, Roland Garros-ah khel leh ngei nise ka duh a, kan pahnihin han intum leh thei nghe nghe ila ka chak khawp mai,” a ti.